上周五一早，見梁家俊穿着便服入羅富全倉睇馬，原來佢專登睇隻「一舖成名」，只見佢同副練陳志忠雞啄唔斷咁傾偈，相信話題離唔開講呢隻馬嘅近況，由於梁家俊穿着普通便服入馬房，所以唔係咁多人留意到佢，睇過呢隻馬約廿多分鐘後，佢順便再入馬格睇睇隻「肇慶威威」，不過，逗留唔夠一陣間就離去，從動態去估計，今日佢騎羅富全兩隻馬上陣，「一舖成名」應該會有料到。
賢廄兩駒照燈搏命
今次日賽蘇偉賢旗下各匹戰馬實力唔錯，其中「恆駿寶駒」及「天池怪俠」，從馬房動態所見均為有料到之馬，上周五下午該兩駒被安排到泳池游水，游水完畢，又再安排有關工作人員拖兩駒照太陽燈，待血液循環更佳令狀態提升，可以在國慶日威威。「恆駿寶駒」今季贏馬後狀態依然保持水準，至於「天池怪俠」，開氣後狀態急速冒升，有力出頭。
友瑩囍增程更合適
在第五場三班千四米列陣的「友瑩囍」，由於負輕磅的關係，故鞍上人依然是田泰安，此君上場與這駒首度合作，跑其最拿手的田草千二米，結果不足兩倍馬只得一席第三名，相信不少馬迷都在牠的身上輸了錢。今次馬房再為「友瑩囍」出戰，但幕後放棄同日的勝途千二米，而刻意揀了場千四米角逐，看馬房的刻意安排，似乎對這駒的韌力是信心十足，信任練者的部署，不妨作為馬膽看待。