■謝霆鋒於銅鑼灣被勁多途人圍住。香港文匯報訊 謝霆鋒近日同香港麥當勞合作，以港式地道風味為主題為THE SIGNATURE COLLECTION設計了兩款漢堡及一系列美食，霆鋒更為今次合作親自創作廣告主題曲《青空》，日前，佢就走勻港九鬧市拍攝廣告兼新歌MV。
為配合歌曲同廣告講述霆鋒對香港這個家的思念及回憶中熟悉的味道，霆鋒特別走勻港九富香港特色的地方拍攝，好似尖沙咀海防道大排檔、九龍城街市海味舖、觀塘、旺角及銅鑼灣等。去到旺角、觀塘，在導演好巧妙的安排時間下，霆鋒完全避開了途人耳目，令拍攝可以順利進行。不過去到銅鑼灣，由於多個Check Point都滿佈途人，好似在百德新街一間運動舖門口時，霆鋒就被勁多途人圍住，不過最搞笑的是去到希慎廣場的大型電子用品商店地舖門外，其中一名途人見到霆鋒後，竟然興奮到打開大門向舖內大叫：「謝霆鋒喺出面呀！」然後圍觀影相的途人愈來愈多，墟冚到將霆鋒淹沒於人海裡面。
事後霆鋒話：「雖然有好多途人圍住，但個感覺好親切。特別在大排檔，那種風味、情懷，唔會有一間餐廳或者在其他國家地區搵到。」至於被途人「大事宣揚」而暴露行蹤，霆鋒就笑住話：「其實我平時真的好少出街，就算出街，最多去的地方就是街市或者超級市場，好少在街行，可能大家冇諗過會在街邊見到我，所以先至會咁興奮。」