日本盃作為日本馬壇第一場以吸引外國頂尖佳駟遠征當地而設立嘅大賽，獎金一向驚人。的而且確呢場賽事過往真係發揮到佢嘅作用，唔少傳奇名駒好似「談唱劇」、「奇異光芒」、甚至以前香港馬王「原居民」都曾經參與其中。不過，隨住近年主隊馬越嚟越勁，自二○○五年由戴圖理策騎嘅「傲家聲」揚威日本盃後，一直未再有外國馬贏過。去年古摩亞集團旗下嘅「愛達荷州」喺莫雅胯下跑獲第五，已算係好好嘅成績。主隊雄霸錦標已有十三年時間，而今年日本盃更有堪稱馬后「貴婦人」翻版嘅三冠雌馬「杏目」擺擂台。其實參戰馬要脫穎而出 難度真係高到爆炸，好彩依家仍有兩匹外國馬肯過去充撐場面，未至於變成只得日本賽駒嘅日本盃。呢兩匹咁有膽識嘅馬，一匹就係出自岳伯仁馬房，去年愛爾蘭打吡及英國聖烈治大賽雙料盟主，早前於法國凱旋門大賽跑獲第五嘅「卡帕利島」，另一匹就係由文令山訓練嘅出爐加拿大國際錦標亞軍「青天雷鳴」，此兩駒分別報名香港瓶及香港盃，且看日本盃後，有冇機會過嚟香港走多轉。
今個周日莫雷拉回歸，先在三項國際賽前哨戰中客串，之後到下月香港國際賽日再度亮相，但由於其日本騎師牌照仍在當天生效，故莫雷拉要下年一月份才能以蔡廄主帥身分重返香港，相信令不少人感意外，畢竟雷神曾講過佢嘅夢想係去日本策騎，依家佢決定放棄追夢重返香港，究竟係咩原因呢？據莫雷拉日前拍片親自剖白，佢今次返嚟香港發展，真係一個愛字，就係佢對太太同埋家人嘅愛。雷神話佢家人一直好支持佢去日本追夢，但當日本中央競馬會的騎師第一階段考試公布之前，佢已經向太太承諾，萬一考試肥佬，就由太太決定下一步點行，同埋去咩地方發展，而太太喺考試前早已講過想返回香港。
另一方面，前馬會副主席布魯士嘅「龍城」系賽駒，清一色支持苗禮德，目前亦有「龍城勝將」、「龍城銳將」、「龍城猛將」同埋「龍城勁將」擺喺苗廄，前駒今季已交出頭馬。不過，要數其中一匹令馬迷印象較深嘅「龍城」系賽駒，應該係已退役嘅「龍城勁將」。呢匹澳洲馬喺香港攞到五冠五亞四季，評分最高試過去到一○八分，曾在主席短途獎跑第三名，喺一七年尾退役。不過，原來「龍城勁將」仍未結束競賽生涯，依家由華禮納訓練，今個禮拜六將出戰喺玫瑰崗馬場舉行嘅一場千一米草地賽，睇吓到時又跑成點？