巴西好手莫雷拉上周日重臨客串，連下三城包辦三寶兼勝出騎師王。在二級賽「中銀理財」馬會短途錦標憑準波士蔡約翰旗下明星馬「旺蝦王」以一放到底姿態摘冠。
雷神一返到嚟立即做主角，先贏「旺蝦王」捧盃、「精算風暴」後上險勝之後，尾場又再一次顯神技，佢夥拍呂廄隻大白鼻大熱門馬「威進駒」壓倒亞季軍「四通八達」同「智愛」，其中「四通八達」更加係隸屬蔡廐、乃大馬主榮智健新貴，雷神贏馬心紅到連波士馬都照殺低呀。講番呢隻「威進駒」，連輸幾場熱門後一換雷神即刻變身，騎者一返嚟亦即中三元兼食三寶，仲做埋騎師王，難怪佢賽後風騷到送飛吻，確實抵雷神沙塵。賽後莫雷拉心情大好，亦接受記者做訪問，呢位萬人迷同大家盡訴心中情。莫雷拉話今季申請做半年主帥去到六月，但佢覺得呢一刻問佢係咪六月後轉公司騎師，絕對唔合適，因為佢依家都未開始合約，佢都要同蔡約翰合作一段時間，然後再作決定，如果大家交到好成績，佢諗唔到原因唔繼續合作，佢講到感激蔡約翰請佢做主帥時，雷神心情非常激動，有啲眼泛淚光，佢話依家好期待，雖然會少啲外線機會，但相信仍然會好成功。至於會唔會返回日本，雷神話除咗考試肥佬，佢話日本各方面都好好，尤其係育馬業，歷來孕育唔少出色賽駒，佢從來冇後悔轉去日本發展嘅決定。至於佢會唔會再考試，佢話佢承諾會留港一段時間，所以明年冇乜機會再去日本考試，但再下一年抑或未來三、四年會點，冇人會知，佢亦唔係一個容易放棄嘅人。另外，今次回港，佢太太都佔咗好大因素，佢講過萬一未能喺日本發展，就交俾太太決定，而佢話佢太太好喜歡香港，有啲喺香港落地生根嘅感覺，既然太太想回港生活，自然以家人為重。