■李卓人又涉嫌違反交通規則。 讀者供圖全盛時期嘅立法會九龍西補選候選人李卓人團隊到底可以一次過違反幾次交通規則呢？之前已經被踢爆無數次涉嫌違反交通規則，包括衝紅燈、違泊、唔戴安全帶直接喺車度企起身嗌咪後，香港文匯報噚日再收到讀者嘅視頻，影住李卓人坐豪華名車遊街嗰陣，直接成個人一嘢從車頂天窗伸出嚟。
唔戴安全帶 遊校區做壞樣
可能李卓人覺得咁樣想迎着風往前衝啦，但其實分分鐘已經違反咗道路交通條例。在視頻中，涉嫌違咗規嘅李卓人仲好風騷咁同學校的家長和小朋友打招呼，有教壞細路之嫌。
李卓人噚日於「西九四小龍」的碧海藍天附近宣傳，咁啱嗰時又去到學校附近，李卓人就趁機同家長及小朋友打招呼宣傳。
視頻中可見，李卓人冇戴安全帶之餘，沿途喺架車度企起身同人揮手，分分鐘已經違反咗道路交通條例。為咗宣傳可以幾無視法規？睇吓李卓人咪知囉！
其實，李卓人假假地都仲係個立法會補選候選人，扮下嘢做下樣都要守下規則啩，但李卓人同團隊多次涉嫌違反交通規則，次數真係多到手指都未必數得晒，除咗係罔顧途人安全之外，分分鐘仲教壞埋班細路仔喎。
如果有個細路有樣學樣，搭緊車嗰陣企係度又成個人飛出街嘅話，到時你又點賠番個仔畀人呀？
照樣「出頭」違規 阿基被傳染？
除咗李卓人咁鍾意違反交通規則之外，估唔到另外一個候選人馮檢基亦「自爆」自己染上違規嘅惡習，同樣喺宣傳車行駛時伸個頭出天窗。齊齊唔要命咁款，真係人類總是犯下同樣嘅錯誤！
根據香港法律第三百七十四F章《道路交通（安全裝備）規則》第七條，私家車司機及乘客均須配用安全帶，其中第七B條清楚指出，私家車、的士及公共小巴後排座位的乘客須配用安全帶。違反有關法例，一經定罪可判處罰款5,000元及監禁3個月。 ■香港文匯報記者 馬壯