■王梓軒與林秀怡即席整「薑餅屋」。香港文匯報訊 王梓軒和林秀怡自從拍完《是咁的，法官閣下》後，二人老友鬼鬼，早前更獲邀出席網絡平台訪問，提早與粉絲慶祝聖誕。二人在訪問中互派戴高帽，林秀怡更笑指王梓軒「奉承」說話講得好，要派利是報答對方，引來眾人取笑「秘婚」。王梓軒就話拍劇，才有機會睇清林秀怡「真實」一面：「其實佢表面好似好嘻嘻哈哈，一埋位就工作好認真㗎，不論個角色戲分多與少，都會有自己的一套。今次同佢一齊上節目，搞到主持人都冇晒心機，因為我同秀怡都有做開節目主持，搶晒對方的對白，主持人都話好輕鬆唔會擔心Dead Air。」
王梓軒被封「才子」
節目期間，二人即席整「薑餅屋」，王梓軒發揮藝術天分整得似模似樣，反而林秀怡則用紅色糖漿砌屋，被主持取笑「追債屋」，秀怡更邊整邊偷食，場面搞笑。王梓軒透露聖誕節都忙於音樂編曲工作，要視乎進度先知有冇假放：「好老實，你話去玩呢就未必有時間，因為幾個音樂Project在手，都想過年前趕起佢，否則做唔晒混音，最終都係搞到自己，所以我都同朋友講，今次邊度有Party你照畀時間地點我，但唔好預我出現住，當我一做完所有嘢就會現身，歡迎大家當我聖誕老人咁期待我的出現。」
二人又一起合唱《分分鐘需要你》，但默契欠奉夾唔啱Key，最終由梓軒出手夾音樂，順利合唱歌曲。林秀怡就話拍劇才跟王梓軒認識，更冠稱梓軒為「才子」：「嗰時以為佢只係識音樂嗰類，點知拍完之後才知對方是一個才子，除了音樂上可以畀意見，討論股票投資都可以搭嘴，佢真係咩都識。」