今日元旦日沙田安排十一場草地賽事，以C跑道作賽，頭場開跑時間提前至下午十二時三十分，全日重頭戲為國際三級賽華商會挑戰盃。練馬師方面，蔡約翰及羅富全均派出不少惡馬參戰，值得優先留意。騎師方面，潘頓及雷神都各執多匹惡馬在手，當可作為扶手棍看待。
第一場、第四班、一六○○米。「傲風雲」丁仔今季接手用心打磨，結果前仗初出即在四班田草千四米贏馬；上仗增程跑一哩，喺李寶利胯下後上不及跑第二；拚後復課出跳勇況未減，今次再戰坐位望贏可做到。
第二場、第五班、一六○○米。「新界之星」季內跑過五次，表現最好係第三仗出爭同程後上第三。講到此駒實力，去季可在四班田草一哩力壓「開懷大少」，現居五班豈會沒有優勢，今次機會可看俏。
第三場、第四班、一二○○米。「英之友」前仗降班跑同程，同組的「快樂旅遊」及「清福」等最近非冠即亞，而本身放至最後百餘米才轉弱跑第五；上次轉跑谷草千二落重飛出擊，可惜力戰下僅得第二；今仗復爭大場千二，冀望可拚出頭來。
第四場、第四班、一二○○米。「翠湖飛鷹」上仗插班初出角逐谷草千二，排在五檔起步，沿途韋達留守第七位，待直路從中內疊一竄而上，最後贏半馬位姿態點到即止；今賽仍留在四班並轉戰闊場，足以再下一城。
第五場、第四班、一四○○米。「智力寶」上仗之前四戰最叻只跑第三，然而上次配雷神喺同程同班熱門打開勝門，只見沿途帶頭前領，末段雖見衝刺時內閃，一度令到雷神難於催策，但最後也取得勝果；今次續攻勝途有力梅開二度。
第六場、第三班、一二○○米。「日日精彩」前仗初出田草直路賽成為一面倒大熱門，早段走勢似模似樣，可是末段衝刺乏力，賽後鞍上人向馬會競賽小組解釋坐騎有內閃傾向；翌仗轉戰泥地千二大熱輕鬆補中；本身體重逾千二磅，今次升班轉戰田草千二，憑其步大力雄跑姿有權添食。
第七場、第三班、一二○○米。「京京千里」（圖1號）今季首戰已在三班田草一千米拚入亞軍，之後三仗跑田草千二和千四，排不利檔位也所負不遠；上回跑番最正宗千二及回配潘頓搏殺，可惜遇強敵只跑第二；現強敵已去，可望替馬主再嚐拉頭馬的滋味。
第八場、第二班、一二○○米。「鄉村瑰寶」季內五戰取得三冠一亞一殿，這類蔡廄三歲優質PPG，十居其九可以一季之內扶搖直上；剛仗配布文勝出谷草千二；今次列陣田草千二乃實力考驗，孭輕磅出拚，再捷望濃。
第九場、國際三級賽、一四○○米。「以奇用兵」今季初出爭千四米狀態只屬初起，力戰之下僅以頸位敗給「大籐王」；再出排檔有利及回配雷神，結果以輕鬆姿態捧走六福珠寶盃；今場原班人馬再臨，可穩奪錦標。
第十場、第三班、一六○○米。「巴基之友」秉承同系馬的鬥志，逢出必搏，今季已出賽五次，交出兩冠一亞一季一第五名；打仔馬復課以慢踱為主，走過身輕步爽狀態仍穩，繼續瞄準勝途，隨時再斬四両。
第十一場、第三班、一四○○米。「夏威夷」蔡廄C布質新之輩，來港後頗快投入操練，出試大閘更見步法凌厲，故此上仗插班初出田草千二，臨場更打成廿四蚊大熱門開跑，結果在雷神力策下追唔到「勝利歡星」未竟全功；極具鬥心年青馬拚後被重加三分，今仗老蔡揀千四增程搏殺，已擺出一副補中決心。