■軒仔、祖兒、謝安琪被古天樂叫上台一齊唱歌。香港文匯報訊（記者 李思穎）闊別樂壇多年的古天樂今年與謝安琪(Kay)合唱歌曲《（一個男人）一個女人和浴室》，憑着半首歌在前晚「叱咤」頒獎禮奪「我最喜愛的男歌手」獎，眾望所歸，古仔更驚喜現身，令全場起哄，萬眾期待之下，古仔清唱經典歌曲《男朋友》，掀起整晚高潮，曾經奪得過「視帝」、「影帝」的他，再捧走埋樂壇獎項，成績大滿貫，稱霸歌、影、視，可說威到盡！身為好友的容祖兒(Joey)亦誇下海口，新一年會向曲、詞、編、監進發，為古仔炮製靚歌再闖樂壇。
商台《叱咤樂壇流行榜頒獎典禮》前晚假會展圓滿結束，張敬軒和謝安琪分別以三個及三個半獎項榮膺男、女歌手大贏家，軒仔更第三度奪「男歌手」金獎，Kay首奪「女歌手」獎，出道20年的容祖兒終如願首奪「至尊歌曲大獎」，Joey即時激動落淚，而被網民熱捧的古天樂眾望所歸奪得「我最喜愛的男歌手」，最大驚喜是古仔親自現身上台攞獎，他如同拳王出賽，高舉雙手同大家打招呼，霸氣非凡，歡呼尖叫聲響遍全場，令頒獎禮添上光環。
做人唔好怕蝕底
古仔行出來時，歌手都企起身拍手，他先與台下歌手擁抱，在台上笑說：「我真係好鍾意唱歌，但唔識唱歌，呢個世界好奇怪，真係有奇迹出現，行到上台攞呢個獎，真係冇嘢好講，感謝投票畀我嘅人。」古仔見台下歌手企了起身，便叫他們快快坐下，不然便像攞終身成就獎，續說：「我最喜歡唔係一朝一夕，大家最喜愛唔係我嘅歌，上年我做了演藝人協會會長，第一個職責係想幫樂壇，用僅餘時間同歌手食飯，了解今日樂壇變化同困難，我知佢哋團火從無熄過，我好開心，你睇下我都可以行上台，作為新人要記住，夢想每日每刻都唔好忘記，仲記得爸爸教訓，無論成功與否，做人唔好怕蝕底，敢去嘗試已經成功了一半，不放棄自己，香港樂壇廣東歌靠你們﹗」
眾星清唱《男朋友》
古仔一番肺腑之言後，便話要同林海峰搞下氣氛，林海峰遂提議古仔唱歌，古仔一時口快疑似爆出粗口諧音，最後古仔請埋Joey、Kay、軒仔和麥浚龍上台，齊齊清唱古仔的《男朋友》，全場high爆。其實古仔早於1999年和2001年，分別憑《刑事偵緝檔案IV》和《尋秦記》奪得視帝殊榮，去年憑電影《殺破狼．貪狼》，首嘗「影帝」滋味，今次攞埋「我最喜愛男歌手」，威盡歌、影、視三界。
得獎後的古仔在社交平台寫下感言：「感謝每位投票給我的朋友，『最喜愛』絕非一朝一夕，感謝各位對我多年來的支持，我深信大家對我的喜愛並不只是在音樂作品上，對我來說更大的意義是支持香港樂壇，支持廣東歌。」
Joey憑《心之科學》首次奪得「至尊歌曲」大獎，集齊所有女歌手獎項，成績大滿貫，她心情開心得難以形容：「我同舒文有個宿命，大家合作歌曲好難取得高名次，今晚一齊攞「至尊歌曲」特別感動，(集齊所有獎項？)除非明天開始寫歌先可以攞埋唱作人，會朝住曲詞編監方向，2019年重新出發。」
Joey向唱作人進發
說到古仔捧走「我最喜愛的男歌手」，Joey謂：「我們私下有傳訊息，我話梗係要來，作為演藝人協會會長，對樂壇咁大推動，我們食過幾餐飯，都係講點樣推動樂壇，既然佢咁有心又有咁嘅機會，呢個Timing最好，可以同大家分享一下。」
Joey唱《男朋友》即忘了歌詞，她笑說：「佢唔簡單㗎，但我搵唔到佢個Key，太低了，相信佢感覺到大家咁歡迎佢，必定會蠢蠢欲動，推一推他重返樂壇，(你寫歌畀佢？)我嗰發子彈一定射畀佢，瞄住佢咁射，（寫快歌？）快歌係咪易食糊？攞埋跳唱歌手，2019年成績表寫我誇下海口，會曲詞編監向唱作人進發，目標歌手是古天樂。」