上年香港馬壇最令人嘖嘖稱奇嘅，就係不斷刷新紀錄，破紀錄破到好似家常便飯咁容易，好似就係塵封近廿年嘅沙田二千米場地紀錄時間，一係就唔破，一破就一年內連破三次。喺上年二月嘅香港金盃（二千米一級賽），「馬克羅斯」成為首匹兩分鐘以內完成二千米賽事嘅馬匹，最記得現場評述員一句：「點解係一字頭嘅？」（意思指花一分多鐘時間完成賽事）令人印象深刻。其後「馬克羅斯」同父同母細佬「歡樂之光」，以及「鷹雄」（圖6號）在一年內分別再次打破呢個紀錄，最新紀錄係一分五十九秒三，認真犀利。至於香港馬王「美麗傳承」喺馬會一哩錦標造出一分三十二秒六四，打破由前馬王「好爸爸」保持咗十年嘅舊紀錄，更加成為歷來第一匹九奪國際分級賽嘅香港馬，絕對係馬王中嘅馬王。此外，香港代表喺剛過去嘅國際賽事首次包攬四場一級賽，係呢個賽日確立四場國際賽事以來嘅第一次全制霸，寫下歷史光輝一頁。今年唔單止高班馬犀利，連低班馬都一樣咁掂。五班馬「海之濤」喺去年十一月廿一日，再度贏出快活谷一千米賽事，成為自跑馬地馬場自一九九五年重建後，贏馬最多嘅賽駒，一共贏咗十一場咁多。此外「海之濤」亦成為自二戰後，贏谷草單一路程最多嘅賽駒；更加成為近二十年來，唯一一匹連續七季都贏到馬嘅賽駒，已經足夠佢名留青史啦。