第一場、第五班、一六五○米。「大把子彈」父系為「子彈列車」，後駒服役時贏過二千三百米，但南半球子嗣普遍遺傳了氣量支持。「大把子彈」前仗季內初出田草千八，在前跟放三段試馬味濃；上仗轉戰谷草一哩，後上小敗五個馬位，兩場用唔同跑法都輸近，證明已踏上軌道，今次賽前悉心操好，眼見熱身後狀態提升不少，在這水準甚弱的五班賽，已甚有可博之道。
第五場、第四班、一六五○米。何良馬房的「騰煌」，上季尾角逐谷草第三班千八米，當時三十七倍冷門身份只輸半馬位跑第二，嗰場有多匹對手在今季都已經贏馬，可見賽事水準絕對唔差；此匹八歲馬今季跑過四場，雖然未有上名紀錄都是跟跑而回，但實際表現未見真章，目前評分經已減到五十四分水平，跑四班谷戰有着數，相隔上賽有六星期，儲足體力上陣搏殺，憑本身較高班底，有力在此場合一舉殺敵。
第八場、第二班、一二○○米。「越感」乃馬會主席周永健名下愛駒，雖然目前已屆七歲之齡，但陣上表現仲未退化，而同父馬「英勇大師」上季七歲亦有馬贏。「越感」本身衝刺力較短，注定在谷中搵食，其中過往於A跑道的成績特別好，最近六次跑谷草A跑道同程，取得三冠一亞兩殿全入前四名，勝在近期狀態大勇，今場上二班改負輕磅，再次爆冷贏馬亦唔出奇。