■被視為民主黨衛星組織嘅彩虹邨服務聯會聯席總幹事莫灝哲，近日帶街坊經大橋去珠海同江門玩。 fb圖片反對派中人不斷抹黑內地，仲話港珠澳大橋係「大白象工程」咁話。不過，佢哋心知肚明呢啲只係佢哋作出嚟阻撓工程嘅借口啫，所以經常搞團返內地，仲將大橋當作賣點。被視為民主黨衛星組織嘅彩虹邨服務聯會聯席總幹事莫灝哲，近日就帶街坊經大橋去珠海同江門玩，就喺fb貼晒相，張張都顯得佢哋笑得好開心，講到底都係嗰句，口裡說不，但身體就好誠實，反對派講一套做一套嘅嘢相信大家都唔係第一次見，但唔該唔好做得咁肉酸囉！
鴿黨有前科 基建做賣點
舊年10月，立法會交通事務委員會一行近20人視察當時即將通車嘅港珠澳大橋。其間，經常抹黑大橋係「大白象」嘅反對派議員，包括民主黨一嚿雲（黃碧雲）、「新民主同盟」嘅咖喱飯（范國威）一直都咁笑口噬噬，不亦樂乎，已經證明咗�哋幾口心不一啦。
口口聲聲話「大白象」，但搞街坊旅行團時身體就好誠實。舊年11月，民主黨沙田區議員吳錦雄同社區主任張宇添就俾人踢爆搞咗個12日去中山、順德嘅「純玩兩天團」，宣傳單張中就雞乸咁大隻字標榜「一次過去晒兩個基建」，出發會經港珠澳大橋，返嚟就坐高鐵直達西九龍站，即刻俾人話又要反又要帶人去玩，「面皮薄啲都做唔出。」
莫灝哲大讚中山5星級酒店
被視為民主黨衛星組織嘅彩虹邨服務聯會聯席總幹事莫灝哲，近日就喺fb出post，介紹佢日前搞嗰個「港珠澳大橋-珠海江門兩天遊」，照片中佢同啲街坊猛咁打卡，對入住嘅中山5星級酒店都讚不絕口，而喺內地嗰兩日間嘅膳食亦令佢哋都非常滿意，仲要問有冇得外賣打包返香港。
莫灝哲最後仲話，該會會「更加落力搞更多更好更精彩嘅活動同旅行比（畀）所有彩虹邨嘅街坊」喎！
彈出彈入，又食又拎又要鬧，恐怕喺電影《思．裂》（Split）中扮出廿幾種人格嘅男主角James McAvoy，都要甘拜下風囉！
■香港文匯報記者 陳川