本地練馬師單位長期短缺，加上澳籍麥菲文季初突然劈炮返老家從練，預咗馬會將會多發練馬師牌照。牌照委員會啱啱檢討季中騎練牌照時，最多人談論當然係突然發牌俾韋達（圖左）下一季開倉，韋達收到通知後亦即刻在記者會宣布，下月年初六賽後掛靴，展開從練的人生新一頁。馬會發牌小組俾韋達開倉雖然嚟得有啲突然，實際圈內人同馬迷都預咗只係遲早問題。畢竟韋達今年四十有七，年紀大咗，韋達近季陣上嘅拚勁同雄心，已經再唔係全盛時期嘅水平，有時搏殺起嚟亦明顯力不從心，佢私下亦一直鋪排棄騎從練，亦坦言希望喺香港呢個成名地開倉。
上季一度盛傳韋達季後掛靴，出任大摩從化馬房副練，空穴來風未必無因，原本真係為將來開倉做準備。點知莫雷拉突然季尾宣布去日本發展，馬會擔心唔夠具叫座力騎師，希望佢再騎多一段時間。韋達係醒目世界仔，過往馬會有乜搵佢幫手亦永遠冇托手㬹。眼前有幾個練馬師空缺，馬會俾機會佢都合情合理。外界對發牌俾韋達當然唔會有絕對共識，有人覺得佢得到馬會特別優待，對本地副練唔公平。然而這始終涉及一個重要的政策轉變，就是以往外籍騎師掛靴後申請練馬師牌是此路不通的，唯一例外可能是蘭尼，但掛靴後做過司閘員與受薪董事，然後去申請練馬師執照獲批，之前曾有馬佳善、李格力及巫斯義等都希望能在港棄騎從練，但這條陞官圖一直只准港人通行，今次有了韋達開倉可以說是有了先例。不過，冠軍騎師直接獲發練馬師牌早有先例，告東尼就係最好嘅例子。何況韋達連續十三屆冠軍騎師、贏出超過千八場頭馬確係輝煌成就，過去二十幾年對本地馬圈嘅貢獻係肯定嘅，發練馬師牌俾一個香港賽馬嘅重要人物，真係冇乜唔妥。眾所周知，韋達待人處事一向手腕圓滑，好多馬主都同佢有非常好嘅關係，呢啲人脈網絡係極寶貴嘅資產，今日可以大膽講一句，佢開倉真係唔愁冇支持，隨時好似羅富全同丁仔咁火速省靚招牌。至於可唔可以好似告仔做埋冠軍練馬師咁成功，就要拭目以待。
另一方面，暫時廣州從化馬場只有九個練馬師進駐，每廄最多豢養廿五匹馬，而且每季頭馬數字要達到十八場才為之算畢業，不過，在不久的將來好快就會加到十一個，到暑假時再度增至十三個。據知從化馬場因為運作經已漸入佳境，所以將會在四月份開始，將會加多兩個練馬師北上，兩人將會係羅富全同丁冠豪，在佢嚟講真正求之不得，事關佢哋兩個倉晨早已爆晒倉，就算有新馬都收唔到，但馬會批咗上從化，養馬量加到七十匹，只要安排好中港兩地人手，咁就掂晒啦。