■伍詠薇(左)坦言不喜歡下廚。香港文匯報訊 伍詠薇日前接受「香港開電視」主持植詠珊訪問，對於多年來都被取笑是「無飯主婦」，伍詠薇可會的起心肝學廚？她決絕地說：「不會！我唔鍾意，又有潔癖，中菜咁多芡汁，又要落手撈乜撈物，會整污糟對手！老公有無投訴？佢敢？佢唔驚我揼佢呀！」
伍詠薇形容同老公練海棠是「外賣夫婦」：「我哋知晒邊間無味精、邊間有機，食外賣得來好健康㗎！」
伍詠薇和袁詠儀、黃佩霞、周汶錡是閨蜜，一眾人妻好友中，誰的廚藝最了得？伍詠薇坦言是袁詠儀說：「阿靚（袁詠儀）領悟力好高，就算佢唔識，但聽完人講，佢就可以煮到似模似樣出來；黃佩霞煮西餐都唔錯；周汶錡就麻麻，不過最地獄都係我，我係無飯主婦呀嘛！」
最近伍詠薇搞笑地在社交網站自稱練成「盆骨大裂開」絕技，還同王君馨「較量武功」，說到運動，伍詠薇最愛瑜伽同行山，她說：「做運動可以保持好心情同正能量，加上均衡飲食，飲好多好多水，就係我的keep fit之道，我長期保持50至51kg㗎！」