■任達華、梁詠琪、袁澧林、星皓影業老闆王海峰等出席港產導盲犬電影《小 Q》煞科宴，片中飾演小Q的其中二隻導盲犬均有現身。香港文匯報訊（記者 李思穎）任達華、梁詠琪(GIGI)、袁澧林、星皓影業老闆王海峰等前晚出席港產導盲犬電影《小 Q》煞科宴，片中飾演小Q的其中二隻導盲犬均有現身，華哥與其中一隻導盲犬布丁見面時非常癡纏，狀甚老友，華哥更攬着布丁合照。
任達華表示拍戲前帶了布丁返屋企培養感情，所以變成好朋友，搞到屋企隻狗呷醋，相信2020年金像獎「最佳女主角」一定是布丁。華哥坦言同狗仔拍戲好痛苦，皆因小Q角色分別由8隻狗做替身，其中6隻狗NG了40多次，布丁好乖，最多也是NG 3、4次，可能我們有了夫妻感情。
問到有否令太太琦琦呷醋，華哥笑謂：「無呀，琦琦睇住有第三者介入，因我同布丁有些特殊訓練，成日要跟住我行同企，牠好聽我話。」他又指拍攝前特別上「黑暗堂」，要蒙住眼在一間約400呎黑房中體驗視障人士生活，感覺幾驚，因不知會碰到什麼東西，最後自己都記到黑房內的有關擺設，測試結果有80分。
說到金像獎剛公佈候選名單，他恭喜電影《無雙》，又讚黃秋生及吳鎮宇的《逆流大叔》都好好，實至名歸，大家指「影帝」獎項僅得一個，華哥即說：「會有雙黃，月餅都有雙黃、四黃啦，五黃就未試過，每套戲都好睇，《逆》片低成本製作都拍得好自然，導演處理得很好。」
梁詠琪怨老公唔捨得小情人
GIGI表示很佩服導演羅永昌的耐力，因經常給狗仔踩到底線，所以拍動物是好大挑戰，對自己來說，跟狗仔做對手也是考驗耐力，幸而在家時有同狗相處經驗，同狗仔對手都很簡單，所以拍攝時比較輕鬆，今次電影主角是「小Q」，也很考牠們演技，所以牠們可以角逐新人獎，也希望透過這部電影令大家關注導盲犬融入社會問題。
GIGI在農曆年留港度歲，每日都忙着拜年，她表示：「女兒見到叔叔阿姨會主動出擊拜年，可以練習社交和膽量。」今日是情人節，GIGI謂：「新年未忙完拜年，未有空去想情人節，年年情人節都是三人世界，老公點捨得放下他的小情人，我一樣不捨得，所以預了一齊慶祝。」
