第六場､第四班､一八○○米。「蒜頭爺爺」前季初次配莫雷拉便打開勝利之門，其後兩年人馬都冇再合作過，直至大前仗故劍重逢出爭谷草二千二米，僅以馬頭位之微飲恨；上次原庄人馬轉戰田草二千放頭補中；今次易配巫顯東縮爭谷草千八勝途，小心冷門俾你驚喜。
第七場､第三班､一二○○米。「越感」季初在三班多次跑近，早在十一月喺A欄同程後上力擒「好得威」，目前評八十三分其實要喺二班打滾，然而今場三班千二評分上調至八十五分頂，令到此駒可以降班列陣，今仗回配最佳拍檔郭能執韁，屆時半冷門值得斟酌。
第八場､第三班､一六五○米。「情趣」今季初一心部署減分，連場落敗後，前仗易配李寶利角逐谷草一哩，以大冷身份後上入位；上仗再戰雖不上名，惟後上所負不遠；復課所見仍有啖火，目前評分比上季贏馬時還要低四分，今次續攻谷草一哩易配貝力斯火燒唔會熱，屆時冷門捧場有諗頭。