■右起：苟芸慧、仙蒂歌羅馥和陳瀅前晚同場。香港文匯報訊（記者 梁靜儀）國際名模Cindy Crawford（仙蒂歌羅馥）前晚出席代言女裝腕錶慶祝活動，當晚出席的還有苟芸慧及陳瀅等。
仙蒂歌羅馥表示曾多次來港旅遊和工作，對上一次是四年前與仔女一齊來，每次來港都覺得不斷有轉變，有很多高樓大廈、購物商場等，但人及食物依然不變。擔任品牌代言已廿多年的仙蒂，表示與品牌就如大家庭，最難得是子女亦是品牌的代言人。 談到與家人相聚的時刻，她笑說：「我屋企人好忙碌 ，個女現於法國，囝囝就在紐約，我又啱啱去完葡萄牙，大家經常去唔同地方，仔女已經長大，有時一定要定下優先次序，將屋企放首位，我會做個好榜樣，因為仔女會留意住。」
剛從馬來西亞回港的苟芸慧（苟姑娘），穿上紅色長裙出席，相比起在馬國出席活動時的性感打扮就較為保守。她說：「條裙係老公幫我揀嘅，佢唔介意我性感，覺得係健康嘅性感（唔怕你畀人睇蝕？）唔會，佢反而開心，代表有眼光。（平時喺屋企都會着得好性感？）睇心情，都會， 老公都會幫我揀衫，又會買手錶同飾物畀我，我哋有情侶錶，佢會喺隻錶度刻字，好浪漫。（會着情侶裝？）我都想着，但老公唔畀喺香港着，出埠就會着。(老公揀任何衫都會着？）佢鍾意偏向女人味、喱士款式，但都要視乎場合，（揀性感睡衣添情趣？）佢都見慣我平時嘅樣，（咁會容易衝動造人？）佢都鍾意小朋友，但唔心急，佢好安全。」
陳瀅鍾情事業型男士
陳瀅透露因工作關係很少戴名錶，加上腕錶太貴不捨得買，但就會買來作禮物送給爸爸：「最貴買過一隻價值六位數嘅錶送畀爸爸，我爸爸佢好靚仔、好勤勞、好努力做嘢養我哋，買貴錶畀佢都應該。（媽咪有冇呷醋？）媽咪就送首飾，最錫嘅外婆就送物業。（幾時到你喺香港買樓？）等我攞咗三粒星身份證先，現在仲未係香港永久居民，應該下年可以攞到。」
問到找男友會否以爸爸作標準？她說：「搵男友都會想似爸爸 ，爸爸到現在都仲好勤力做嘢，唔想退休，我鍾意事業型男士。（鍾意成熟型？）可以接受到比我大十年。（細十歲？）唔係用年紀睇成唔成熟，係睇思想。」問到緋聞男友陳家樂跟爸爸是否同一類型？她笑說：「兩個都做唔同行業，家樂工作都好捱得，都靚仔，佢應該都孝順。」