■洪卓立認真學整壽司。香港文匯報訊（記者 植植）洪卓立（Ken）近日推出新歌《數寄屋橋次郎》比喻一個與頂級壽司店擦身而過的愛情故事。要成功預約到最頂級壽司店可能用成一、兩年時間，與其等待，Ken就實行在五月五號親手整壽司，餵飽一班Fans。日前佢仲專程去學師，希望化身壽司大神！
要成為壽司大神邊有咁容易！仲要同唔識中文的日籍壽司師傅溝通已經係一個大問題，雖然有翻譯姐姐在場，但Ken堅持自己「翻譯」，好似師傅話要溫柔地洗米，唔好揉爛米，Ken就話要「好似見到仇人咁捽落去」，仲話師傅讚佢好靚仔。果然翻譯錯誤，在他一開始整卷物就搞到成手黐滿飯。好不容易整好卷物，佢立刻拎上手對住鏡頭大晒自己的成果，點知搞到卷物入面粒蛋跌出來，相當「論盡」。最後師傅畀分，十分滿分，阿Ken只得兩分，仲有好大的進步空間。就連阿Ken自己都慘不忍睹，話碟卷物賣相差，仲話不如到時自己畀錢請大家食就算。
事後阿Ken講返其實卷物比佢想像中難整，「要做一個心形的卷物，保持佢整出來個樣要夠靚仔原來係好難。」講到有無關於食壽司的趣事，Ken就話自己曾經中伏，「香港通常一些高級壽司店，個名都比較短或者得一個字，但係原來日本並唔係咁樣，我試過在日本最後一日上機前，隨機入了一間舖頭，點知難食到飛起，最後食了一半，帶着憤怒去機場。」不過Fans放心，五月五日食Ken整的壽司唔會中伏！