今季大賽已跑得八八九九，國際一級賽只剩下周日嘅遮打盃，正式踏入倒數階段，馬迷有興趣關心嘅可能係冠軍練馬師之爭有幾激烈；馬會最關心嘅自然係總投注額，過去十幾年賽馬投注額好似坐火箭咁升，每季都話再創新高，不過據知今季投注額暫時比起上季疲弱，埋單計數好有機會錄得跌幅。其實賽馬投注額自從喺低位止跌回升，眾所周知唔係單靠本地投注額支撐，即使本地投注額持續有增長，再加上內地資金近幾年積極參與本地賽事，始終都會去到摸頂水位，升咗咁多年都差唔多飽和，隨住馬會大力發展匯合彩池，賽馬投注額持續急升，好大程度係歸功呢啲新興參與匯合彩池嘅地方投注。據聞今季匯合彩池嘅投注額升幅不及預期，係總投注未能再突破嘅主因。無論做乜生意，就算賽馬博彩亦唔例外。某啲海外地區嘅匯合彩池去到樽頸位，聽聞馬會負責有關方面部門，近排努力諗緊辦法，睇吓可以點樣進一步刺激同提升匯合彩池嘅成績。馬會係非牟利機構，但對營業額當然升得越多越好，但現實投注額又點可能無止境咁年年升？退一步海闊天空，如果維持到上季嘅高位已相當唔錯，相信馬會現時都寄望今季餘下呢十幾個賽日，可以拉返高啲投注額，季尾埋單拎張好好睇睇嘅成績表出嚟見人。
之前兩隻跑法引起高度爭議嘅問題馬「日日精彩」同「志在四方」，上周六同日再跑，無獨有偶兩隻馬都用到潘頓，睇幕後用到最好嘅騎師就係想贏馬交代，雖然篤定成為大熱，但潘頓跑來有板有眼順利勝出，但此位冠軍級好手，跑馬有幾能人所不能，馬迷都一清二楚。香港跑馬長期都存在捧人多過捧馬嘅狀況，早幾季莫雷拉當時得令，騎乜馬都熱，捧人已經到咗非理性程度。今季形勢有變，雷神最孭飛騎師個位變咗潘頓，一樣係騎隻牛都熱咁誇張，但潘頓全熱門跑到冇影倒灶，亦係家常便飯，甚至買佢贏埋都唔夠輸。老實講，同係最具叫座力騎師，大部分普羅馬迷應該會認同，潘頓恐怖過雷神多多聲。所謂贏馬一條龍，個個騎師贏嘅時候，留放走位都精彩絕倫，潘頓勁起上嚟時啲布[亦唔使多講，但佢輸馬好多時亦出神入化，塞死冇位、有位唔出，排內檔變全程走外疊，直路埋牙舉鞭唔打、聲稱覺得隻馬有事收慢唔騎等等，爭議騎法層出不窮，總係唔能夠令人放心捧場。潘頓今季鐵定成為冠軍騎師，季尾諗佢啲馬就更加傷腦筋，事實買佢時就跑到冇影，飛咗吨S走入嚟隊爆哂，真係非常難攪。本來跑馬就係咁，馬迷揀馬要鬥智鬥力，但有時睇到潘頓啲礙眼騎法，輸咗條氣都唔順，更加谷氣就係見馬會競賽小組，唔去抽秤啲問題跑法之餘，仲有意無意厚待潘頓，結果咪變本加厲囉。