■林宥嘉在台上不時講廣東話。香港文匯報訊（記者 李思穎）台灣歌手林宥嘉（Yoga）一連3場假紅館舉行《林宥嘉idol世界巡迴演唱會香港站》前晚圓滿結束，Yoga的舉手投足令全場粉絲high爆，其太太丁文琪亦有神秘捧場，Yoga又自爆太太指他台前扮靚仔，返到屋企就好「烏搲」，人前人後兩個樣。
當晚前來睇騷圈中人有容祖兒、彭秀慧、謝安琪、陳健安等，Yoga幾乎整晚都以廣東話同粉絲交流，其間他叫歌迷開着手機的燈營造燈海效果，現場有些歌迷「不聽話」，他便用廣東話說：「唔識開燈，搵隔籬朋友『膠膠』(教教)佢。」引來全場爆笑，Yoga可能以為自己誤說髒話即以英語再說一遍。
一度感動落淚
之後唱《走鋼索的人》時一度轉身感動落淚，他回過神便說：「我唱得太投入。」聽到歌迷叫他不要難過時，Yoga搞笑道：「我沒有很難過，只是覺得自己唱歌好好。」Yoga走近觀眾席握手時，歌迷表現瘋狂，趁機抱抱摸臉，當他收到歌迷所送的大公仔時，淘氣地將公仔塞進斗篷，隨即又掟回觀眾席，最後兩度「安哥」下為個唱畫上完滿句號。
Yoga於慶功宴時，被問到太太和兒子有否到來，他表示：「囝囝太細要早睡，太太就有來為我加油，其實我都唔知，我同佢講真係好攰，今日先見到佢，真的很驚喜，太太來了給我多少少動力，因希望她睇到我最靚的一面，我平時在屋企好烏搲，太太成日話我出面就扮靚仔，喺屋企就好烏搲。」
囝囝鍾意跳舞
完成三晚演出後，Yoga受訪時即謂：「我好眼瞓，怕講錯嘢，你們唔好問我太難的問題。」大家指他廣東話越說越好，他笑說：「因為個腦開發咗，加上身邊好多同事是香港人，佢哋同我講好多廣東話，(會同囝囝講廣東話？)未試過，佢仲細未識講話，但好似又聽得明，好得意，佢又好鍾意跳舞，有時我喺屋企隨便唱，佢便會郁來郁去。」
Yoga首次開三場紅館騷，自言很累，所以聽到主辦單位想他下次挑戰更多場數時，不禁「起雞皮」，Yoga說：「因每場都會用盡所有Energy，不過有機會應該試下，作為好歌手應該有幾多歌迷想看就應該開幾多場，(可以開足一個月？)我有咁多歌迷咩？」