見習騎師黃俊上周晨操發生意外，據聞目前喺醫院深切治療部留醫，慶幸冇生命危險，但今個馬季都唔使預佢復出。其實唔係班前線記者鍥而不捨，上次夜馬期間向馬會高層追問黃俊情況，外界根本唔知道佢傷勢有幾嚴重，實情馬會官方由事發至剛周日賽前，一直冇正式交代黃俊嘅傷勢，唔知有乜咁不可對人言。晨操走甩馬導至騎師發生意外，好多賽馬傳媒已即時報導，唔明馬會點解可以當冇事發生，只係公布黃俊上次夜馬坐騎更換騎師就算。呢個做法令人覺得有關方面欲蓋彌彰、隱瞞意外成因，亦引起外界對黃俊嘅傷勢有好多無謂猜測。意外嘅嘢人人理解，冇人想發生，但係馬會報喜不報憂呢種處事態度同思維，完全冇透明度真係好差。講開騎師健康狀況，馬會上周三夜馬前一日就公布莫雷拉身體不適，可能騎唔到，最終賽日早上通過醫生檢驗可以出賽，而賽前曾經身體不適嘅莫雷拉當晚非常神勇四喜臨門，賽後又係班記者問返，先知道雷神之前係感冒發高燒，並唔係其他肌肉關節嘅傷患。騎師健康狀況，直接影響馬迷決定買唔買佢啲馬，講緊嘅係投注者切身利益。馬會公布話騎師身體不適，又唔詳細啲講清楚邊方面唔妥，係傷風感冒、發燒喉嚨痛等小病，抑或係身體有其他傷患？馬迷喺投注前係完全接收唔到有關資訊，但係呢啲資訊絕對唔應該收收埋埋，應該喺宣布騎師適宜出賽時順帶交代清楚。黃俊受傷同雷神抱病兩單個案，都睇到有關方面喺發放賽事資訊幾咁求其同離地，講多幾句騎師傷病狀況，等馬迷自己衡量買定唔買，試問有乜咁難呢。
外國馬圈消息方面，現年五十七歲嘅沙場老將勞愛德，先後試過喺南非、毛里裘斯、英國及香港等地策騎，依家佢就主要以澳洲昆士蘭省作為策騎基地，近三年亦登上昆士蘭冠軍騎師寶座，絕對係寶刀未老。不過，歲月催人，曾經講過今年掛靴嘅勞愛德，日前公布完成七月中東奔馬場嘅賽事後，就會結束佢傳奇嘅策騎生涯，佢亦話終於有多啲時間陪吓啲仔女，而佢囝囝目前喺靈犀牧場擔任見習學員，新馬季就會正式出道。既然有囝囝承父業，勞愛德真係可以安心退休啦。另一方面，至於早前馬會越洋轉播新加坡克蘭芝一哩賽日，其中在千二米一級賽獅城盃，由潘頓跑獲亞軍的「林家遊輪」，已落實遠征下月英國皇家雅士谷賽期，由兩屆新加坡冠軍騎師杜奕夥拍出戰千二米一級賽鑽禧錦標。父系出自CASINO PRINCE的六歲馬「林家遊輪」，在新加坡出賽廿次獲得八冠四亞四季，為兩屆新加坡一級賽獅城盃冠軍，累積獎金逾一千萬港元，並曾於去年十二月來港出戰香港短途錦標，在布文胯下跑第七名。