■前晚最驚喜是古仔唱歌加埋跳舞。香港文匯報訊（記者 李思穎）容祖兒演唱會進行得如火如荼，前晚已經去到第十一場，更請來「最受歡迎男歌手」古天樂擔任嘉賓。抱恙上陣的古仔表現甚high，罕有在台上又唱又跳，更要求首度公開獻唱的《今期流行》重複唱兩次，又主動邀請粉絲上台合照，相當風騷，把全場觀眾樂瘋了！
當晚前來捧場者有幾乎每晚現身紅館老闆楊受成伉儷、蔡一智夫婦等，Joey介紹嘉賓出場前，先叫大家猜估：「這位男神，全港無人唔鍾意佢，佢由細到大都好錫我，以前曾經在我演唱會擔任過一次嘉賓。」Joey着全場觀眾一齊跳《今期流行》的「拜神舞」動作給古仔做禮物，現場萬多人即時瘋狂起哄，當響起《今期流行》音樂，古仔破天荒首次現場演繹這首歌，大家無比激動，古仔一邊唱一邊跟觀眾握手，迅即把氣氛推到沸點，整個紅館像被叫到快要震裂一樣。Joey睹狀忍不住說：「我第十一場表演嘉賓古天樂，真係顛倒眾生呀！」
古仔主動要求重唱
古仔自言抱病上場，更自爆之前未試過現場演繹《今期流行》，Joey說：「係呀，佢呢輩子未現場演繹過呢首經典金曲，真係好錫我呀，係咪前世欠咗我㗎？你記唔記得好多年前做過我演唱會嘉賓？」古仔笑說，「你真係當我老人痴呆症，我以前同你影過張相嘛。」Joey即說：「係呀，嗰時你仲拍緊劇，我喺電視台撞到你，當然唔會放過機會啦，就係呢張相溝掂你！哈哈，我講笑，你嗰陣好白㗎，不過現在都唔係好黑。」引得觀眾哈哈大笑。
古仔突然說「谷鬼氣兼火滾」，原來是戴了耳機，聽不到現場聲音，主動要求重唱一次《今期流行》，說畢後望到Joey愕然表情：「點呀，你驚overrun？你係咪都加咗場啦。」Joey笑說，「唔驚，呢個人真係鍾意唱歌！」最驚喜是古仔唱歌加埋跳舞，更走勻全場握手，氣氛熱爆。隨後Joey細心為唱到喘氣的古仔抹汗，此時，古仔又有新搞作，提議請觀眾上台合照，現場繼續升溫，Joey就大讚古仔好人，外表好惡，內心很善良，但就擔心接下來的嘉賓不知怎樣做才好，結果有三位幸運觀眾上台合照，影完相的古仔笑說：「我同你講接觸吓人，大家開心咪好囉。我走啦。」Joey就拉住古仔不肯放人：「你咁鍾意唱歌，你唱多首啦。」觀眾再次歡呼，古仔於是留下來同Joey再合唱《男朋友》。