今日講解一下三T場合騎練成績，練馬師中，羅富全就喺三T場合取得上佳的成績。羅富全馬房上季共取得六十五冠五十一亞四十五季，勝出率14%及上名率34.6%，但三T場次卻交出廿八冠十四亞十一季，勝出率20.7%及上名率39.3%，比全季整體成績為佳，勝出率更多逾六個百分點。旗下馬匹之中，「星叻」、「兵貴神速」、「精神威」及「數糊勇士」上季均取得兩場勝仗，而悉數在三T場合之內取得，有理由相信是針對性部署，馬迷值得記存。潘頓貴為上季冠軍騎師，以一百六十八場頭馬力壓群雄，喺三T場合贏馬最多亦係理所當然嘅事，翻查上季潘頓喺三T場次就交出五十六冠三十七亞二十季，勝出率25.8%及上名率52.1%，與本身季內成績相若，此子上季雄心萬丈要破盡紀錄為重任，戰意方面相當鮮明，因而有這成績，今季能否保持百分百戰意？咁就真係要睇佢少爺仔心情喇。此外，兩位本地見習生之中，上季喺三T場合成績都較整體成績為佳，苗廄門生黃俊上季合共取得三十八冠廿六亞三十三季，勝出率11%，但三T場合則取得十五冠六亞九季，勝出率達13.4%；至於羅富全徒弟陳嘉熙全季取得九冠十二亞十季，勝出率8%，上名率27.4%，但三T場合則取得四冠三亞兩季，勝出率10.5%，明顯搏殺更加得心應手。