■張晉與蔡少芬甜蜜咀嘴。香港文匯報訊（記者 叮噹）恭喜恭喜！前天是大肚婆蔡少芬（Ada）46歲生辰，適逢所屬經理人公司辦公室開幕日，旗下一眾藝人包括Ada、老公張晉、朱茵、鄧麗欣（Stephy）、原子鏸丶歐倩怡、戚其義等，集齊一起為壽星女Ada送上驚喜。大腹便便的Ada人逢喜事精神爽， 以一襲白色連身裙到場，神采飛揚，十足「開籠雀」一樣，滿場飛跟其他人分享佗B心得。
要數全場溫馨之最，當然是張晉為太太Ada驚喜送上一束46枝玫瑰及粉紅蛋糕，認真別具心思，還親手撰寫生日卡，逗得Ada四萬咁口，Ada更情不自禁不時向張晉送吻，羨煞旁人。事後Ada笑言：「佢記得我生日，仲準備咁大束花，已經好開心！」問到張晉可有送禮物給她？她表示：「對上一次收禮物已經係聖誕節，當時佢送咗個手袋畀我，其實好感恩，我哋兩個都冇乜物質缺乏，買禮物都係為咗氹吓對方，佢仲話我今年都冇送生日禮物畀佢。」
撇低愛女享受二人世界
提到生日願望，Ada表示最緊要是平平安安生個健康BB，而問到 Ada前晚跟張晉可有特別慶祝活動？她透露撇低兩位女兒張楚兒、張信兒，與張晉食飯共度二人世界：「前晚有朋友送咗一間酒店房畀我們，所以我要撇低兩個女，好好去享受，佢哋朝早已經同我講咗生日快樂，仲叫我玩得開心啲。佢哋兩、三個星期前已經送咗生日禮物畀我，佢哋將自己鍾意嘅玩具放落鞋盒送畀我，不過轉個頭就攞走晒。」
此外，席上朱茵祝賀Ada時，笑言叫Ada再生多個，成為「多產」藝人，在旁的Ada聞言即謂：「啋過你！呢啲『多產』我唔要，工作嗰啲『多產』我就要。」提到朱茵的「多產」論，Ada 表示：「同朱茵大家咁話，叫佢追多個先，而 Stephy 就快啲結婚啦！我就夠喇，冇手再抱，我老公要留返一隻手攬我，所以我『封肚』，生埋呢個夠晒數。」