今日沙田安排十場國慶日草地賽事，以A加三跑道作賽，頭場下午一時正開跑，全日與行兩場盃賽，分別為慶典盃及國慶盃。練馬師方面，大摩、告東尼及蘇偉賢皆派出不少惡馬列陣，可優先留意。騎師方面，雷神、潘頓及田泰安均手執多隻實力馬，可作為扶手棍看待。
第一場、第四班、一二○○米。「八卦」於上季煞科日角逐四班田草千二，排中外檔出閘敏捷，碰上多匹快馬奮力搶先，何澤堯當機立斷留而不放，走三、四疊扣在第六位，入直路後縱使一度窒步下仍能殺入Q腳；如今更配合馬房重兵出擊，戰意百分百。
第二場、第四班、一二○○米。「安定繁盛」羅廄質新分子，上季唯一上名喺泥地千二跑第三，不過也曾喺谷草千二得殿軍；雖然打後兩戰名落孫山，但當中煞科日轉戰千四隨主馬群衝線，足見鬥心不弱；今季往從化操練，磨利槍頭季初上陣已可爭功。
第三場、國際三級賽、一○○○米。「小巨人」上季健康回穩，結果喺頭尾兩役交出頭馬，細看上季尾最後一役贏沙田銀瓶，末段爆發力強勁；今戰無疑要負頂磅出戰，但對手並不多，加上賀賢馬房仍未開糊戰意百分百鮮明，屬開齋黃金機會。
第四場、第四班、一六○○米。「加州明雋」上季尾煞科日初跑千八，臨門WQ飛齊落，以一貫放頭跑法應戰，頭三段放得慢，然後尾兩段加快跑回一席第五；今季成熟再進一步，上回初出爭田草一哩即成功變身，貼欄前置走，最後贏兩馬位打開勝門；現續攻同程，只要放出便叫糊三飛。
第五場、第四班、一四○○米。「發財寶」剛役轉倉初出田草千二即贏嚇人一驚，配沈拿沿途前置跑主動，就此帶返終點輕鬆掄元，造出一分零八秒八一刷新四班此程班際紀錄時間；目前仍留四班添食機高。
第六場、第三班、一八○○米。「悅裕」上賽初出跑泥地一哩，起步順暢，結果入彎兜出外疊蝕追跑第三；經熱身後今次轉戰田草千八，以其上季在田草一哩後上贏馬姿勢，捲土重來應更具爭勝把握。
第七場、國際三級賽、一四○○米。「美麗傳承」中距離馬王上季在港八戰八捷，創下香港馬匹單季八勝頭馬的紀錄，並成為香港賽馬史上贏得最多獎金的賽駒；大摩今季仍特意安排牠重遊上季成功之路，一早已將首個矛頭指向這場慶典盃，相信只要克服重磅，又可有頭馬落袋。
第八場、第三班、一二○○米。「牛角仔」上季五戰得兩冠兩亞一季表現準繩，其中初戰三班一役配貝力斯，末段與「競技勇士」單打獨鬥，憑極強鬥心及貫注力擊退對手；今季此駒待大跑道重開後即投入操練，潘頓亦識貨快試多課，結果一出即力拚入Q；今次強敵遠去，補中決心昭然若揭。
第九場、第三班、一四○○米。「聰明導彈」上季初出角逐四班田草千二，即能在韋達胯下以近四個馬位的壓倒性優勢輕取對手，賽後難免被大幅加分，可惜升班接戰大半季皆未能一逞。今季初出田草千二由潘頓執韁，沿途留守馬群前列，拉士打衝鋒力挫「德勝門」征服三班；今場只要發揮出一貫水準，可坐定粒六。
第十場、第二班、一二○○米。「忠心勇士」上季三戰三勝，季尾插入三班出爭千二首與舊馬交鋒，結果克服十四檔埋到欄一放到底，而且潘頓喺直路齋推不鞭不騎，收韁仍勝個幾馬位，實力認真超到暈！翻看日前試閘走勢出色一氣呵成，成熟程度再進一步，今次只要擺前且戰且走，征服二班冇難度。