九月十八號晚因為「天祿」（圖前駒）出賽可能引發嚴重安全風險，馬會大刀闊斧取消夜馬，社會上有好多意見，有啲人覺得馬會驚得滯，有啲人又讚馬會高招，此時此地有好多情況係無得預計，絕對博唔過，取消夜馬補賽係最安全合理嘅做法。馬迷基本上都唔多想跑馬受政治影響，賭吓馬喺呢一刻應該可以令大家抽離現實輕鬆吓。取消賽事，馬會管理層肯定好無奈，馬會主要業務係開賭，對於任何政見嘅顧客都無任歡迎，做莊抽水點講都係維持中立，無謂得失顧客。
目前香港社會嘅動盪局勢仲會維持幾耐，大家都唔知，博彩都係消閒娛樂事業，如果話馬會嘅業務同收益無影響就呃人。最直接係馬會已經持續幾個月，需要因應各區公眾活動情況，關閉該區嘅場外投注站。馬會當然要顧及員工安全，做法合情合理，據聞現時大約三成投注額來自投注站櫃位，好在馬會近年大力開發數碼投注工具，喺呢段非常時期就見到回報，大大減低咗馬迷嘅不便。馬會都預咗季初階段賽馬投注額低開，據知另外嘅業務如足球博彩嘅投注額，因為社會局勢嘅影響更大，歐洲四大聯賽開始後，投注額明顯跌咗。眾所周知，玩足智彩嘅擁躉中，後生一輩佔咗好大比例，現在社會局勢不明朗，欠缺投注心情，投注額下跌亦無可厚非。