馬不停蹄，今季跑咗個幾月馬，賽事已經出現咗唔少爭議研訊，競賽董事小組監察水平，似乎達唔到公眾嘅期望，尤其今季幾單研訊抗議裁決同跑法查詢，似乎華洋有別嘅情況越嚟越明顯。
講到抗議裁決，唔能夠唔提嘅係早前谷草夜馬黎海榮騎「童話」因末段干擾其他馬被判告甩。競賽小組一貫做法都係假設如果無干擾事件發生，邊隻馬會先過終點。巡邏影片好清楚，黎海榮已經極力控制內閃嘅「童話」，就算無碰撞都唔見得會輸俾本來跑第四嘅「優悠皇」，偏偏最終抗議成立。前事不忘，開鑼日杜美爾贏「熱血鬥士」，大半條直路持續急劇內閃，佢仲不停打鞭，騎師固然無履行責任修正坐騎，干擾程度亦更加離譜，但係小組就判賽果不變，真係唔知乜嘢邏輯及準則。杜美爾唔算叫座騎師，競賽小組都格外開恩，孭重飛嘅潘頓同莫雷拉，小組就更加好似買佢怕咁。潘頓騎大摩馬房隻「忠心勇士」點留隻馬、雷神騎苗禮德馬房隻「銀紙」終點點樣撻Q，呢啲馬嘅發揮留放，衝線係咪全力催策，公眾馬迷有眼睇，冠軍級騎師發揮仲衰過一般牌仔，次次賽後小組對佢哋啲解釋又照單全收。馬會都應該明白，現今嘅競賽小組係個隨時會爆炸嘅計時炸彈，回顧眼前社會嘅亂局，就係以往累積埋嘅不滿一次過爆發，若監察繼續不力，遲早爆大鑊收唔到科。
另一邊廂，作為一位冠軍騎師，潘頓近幾次賽事嘅成績，只能用唔合格嚟形容，即使佢之前成功憑「轉數高」、「快樂實在」做到日行一善，但曾夾埋輸咗十匹大熱門，當中包括兩屆三料馬王「美麗傳承」，同只得十四蚊嘅「經典之星」，真係輸怕馬迷捧場客，如果只計獨贏彩池，大家又知唔知究竟輸咗馬迷幾多錢，八千萬、九千萬？通通唔啱，答案係一億三千萬元呀。睇返啲資料，潘頓幾匹大熱之中，有五駒獨贏票數逾千萬，就係「自由喜」、「札西德勒」、「劍追風」、「美麗傳承」同埋「經典之星」，後駒獨贏票數更高達千八萬。
人人都會追求本身最大利益，因而騎師會選取最有機會賺取獎金的馬，而好騎師由於每每有機會接觸較多的馬，加上本身往往有着過人的感應，能作出正確選擇的機會相對較高。當然這是簡化了的推論，因為有些時候騎師可能會為了長線利益而犧牲短線利益，例如為了與大馬主或大練馬師建立長遠關係，明知一匹馬實力較次也接手。亦有一些時候除了獎金外，還牽涉一些暗牌的利益，資深馬迷會明的，也有一些時候是溝通上的問題，騎師一早應承了騎某匹馬，卻不知道另一上賽坐騎原來也選擇了在同場上陣，因而分身不暇也是常有發生的事，潘頓一日手風未轉順，捧得太熱應有戒心。