第一場、第四班、一二○○米。霍利時馬房的「甲烷」購自紐西蘭，馬主係股市評論員孫柏文，佢對上一匹合夥馬「樂家將」在港三十三戰不勝後喺上年退役，之後再引入馬匹亦一波三折，孫柏文睇中一匹馬準備運港，可惜撞樹重傷，最終臨時臨急引入「甲烷」來港頂替。佢提到愛駒命名由來，「甲烷」為天然氣的最主要成份，係重要的燃料，一遇到火就會爆炸，果然「甲烷」在港一出即爆入冷位，可見此匹自當紅種馬「比亞路」子嗣有點質素，汲取經驗再來應可坐正。
第五場、第四班、一八○○米。羅富全馬房上季手執幾匹過千萬身價馬，當中「添滿意」成功為他首勝打吡殊榮名利雙收，不過同樣屬千萬身價嘅「鴻圖巨星」真係同馬唔同命，目前評分降到六十分都未贏，連Q都未入過，不過希望在明天，前一場跑谷草一哩終於有走勢得第三，證明已逐漸適應本地水土環境，今仗首次落到四班上陣跑谷草千八米，始終呢匹馬喺未來香港之前曾經在二千二百米澳洲昆士蘭打吡一級賽跑獲亞軍，今場跑千八米當然夠長力，兼且對手為來港之後最弱一次，對爭勝機會梗係好，呢匹過千萬港元身價馬「鴻圖巨星」應可演出身價贏番場。