澳門打吡冠軍馬「聖靈之都」，剛周日在港出戰國際三級賽莎莎婦女銀袋，面對多匹實力強勁的分級賽冠軍馬，仍然不落下風，更克服走外疊不利場地，在這場破場地紀錄的國際三級賽中，造出全場最快末段時間追入殿軍，爆出一席四重彩冷腳，盡顯本身的優秀實力。據悉「聖靈之都」幕後有意報爭兩周後的國際賽預賽，途程為二千米的國際二級賽馬會盃，爭取十二月份香港國際賽入場券。不過就不獲香港馬會批准暫時留港，要於賽後翌日即剛周一搭船運返澳門，下星期先可以再嚟過，以「聖靈之都」剛周日陣上表現，絕對夠資格入選馬會盃。前港將土炮何華麟，剛周日重返成名地出戰莎莎婦女銀袋賽日，在正本戲夥拍澳門代表「聖靈之都」跑獲一席殿軍，其餘兩匹坐騎則不獲獎金，無功而還之外，更因策騎姐夫羅富全旗下「三生好運」，在第三場賽事犯下不小心策騎，被重罰停賽四個香港賽日，等於澳門實際停三個賽日之多，損失慘重。至於同一場賽事，莫雷拉亦犯下不小心策騎，但因為策騎紀錄良好，只被罰停賽兩個賽日，相比犯同一條規例的何華麟，被罰少一半，因此惹來了網上馬迷不滿，質疑競賽小組判決不公。不過，從另一角度去看，競賽小組之所以重罰何華麟，可能鑑於騎者過往策騎紀錄，事關翻查何華麟之前兩次來港客串，都曾經犯下不小心策騎被罰，先後被罰停兩日及五日，但有網民唔係咁睇，從陰謀論角度看，何華麟之所以次次來港都被罰，其實係根本唔想佢嚟咁解云云，當然咁係絕無根據的想法。至於何華麟姐夫羅富全旗下「添滿意」同「達龍駒」，喺婦女銀袋分跑第八及包尾，賽後羅富全就話俾「達龍駒」鞍上人嘅策騎指示係跟前啲，「添滿意」就係守在大約四、五位，但未做到預期效果。而騎師向佢匯報慢步速有所影響，今日唔太利留後，所以名次未如理想，練者指「達龍駒」比較細膽，下次都可能會轉吓配備，而「添滿意」目標就係國際賽香港盃。
日本賽馬業龍頭大哥嘅吉田家族，今年經歷唔少傷痛，最令人心傷嘅一定係種王「大震撼」逝世。為咗尋求下一匹「大震撼」，延續佢哋社台牧場喺配種界嘅地位，吉田家族除咗喺國內積極發掘佳駟接班，亦喺世界各地物色良駒，然後引入返回日本配種。今年暑假，吉田家族喺美國購入喺草地長途賽表現出色嘅五歲馬Bricks And Mortar配種權，其後此駒亦立即攻下一級賽雅靈頓百萬金大賽。而喺日前上演嘅育馬者盃草地大賽，Bricks And Mortar再次展現能力，力壓今年英國葉森打吡冠軍「御用畫匠」等對手，贏出呢場二千四百米草地一級賽。值得一提，Bricks And Mortar今年六次上陣錄得全勝紀錄，先後攻下飛馬世界盃草地邀請賽、曼赫頓錦標、雅靈頓百萬金大賽同埋育馬者盃草地大賽，幾乎篤定成為今年美國日蝕馬王，吉田家族睇嚟無入錯貨，眼光果然一流。