■黃嘉雯、王菲與古佩玲、戴祖儀及周奕瑋等出席明珠台節目《絕色星期二：野性風之島》記者會。香港文匯報訊（記者 梁靜儀）應屆香港小姐冠軍黃嘉雯、亞軍王菲與季軍古佩玲、戴祖儀及周奕瑋等，昨日到電視城出席明珠台節目《絕色星期二：野性風之島》記者會，眾人戴上動物帽分組玩急口令遊戲。
黃嘉雯受訪時表示近日都是忙於為台慶綵排，問到可有接到商演活動時，她坦言沒有：「主要都係做慈善活動。（零收入？）都唔係零收入嘅，都有底薪。（但底薪好少錢？）OK啦。（食老本？）入行之前都有工作，用吓積蓄啦，現在都要攞啲積蓄嚟用。（生活有冇困難？）咁又冇，希望可以盡快習慣新生活模式。（可會覺得生不逢時？）都唔會，好多嘢冇人會想發生，今次大家都好唔開心，都好明白。（有冇需要男友幫手？）冇需要。」問到她沒有工作，是否可經常陪伴男友？她笑說：「咁都好應該，又唔係成日黐住男朋友，我都有約朋友。」
齊戥蔡嘉欣做主持開心
提到落選港姐蔡嘉欣已有機會做節目主持，黃嘉雯表示都很替對方開心，覺得對方都是叻女，相信自己完成一年港姐工作後好快都會有機會。笑問會否覺得唔得獎好過得獎？她就不認同：「唔會，獎項都係一個榮譽，反而開心為自己嘅努力有一個認定，同埋都有獎金。（獎金可以用到幾時？）呢啲豐儉由人。（出入搭港鐵？）搭公共交通環保嘛，就算畀人認到都唔怕。」
亞軍王菲與季軍古佩玲亦表示現時主要工作是履行港姐任務，多是出席慈善活動。問到可有生活壓力﹖王菲說：「冇乜壓力。（食老本？）係，好彩之前讀大學時做模特兒有積蓄，自己使就夠，畀唔到家用屋企，家人都好體諒及支持，最緊要搞掂自己先。（男友支持？）男友冇乜幫，但會請我食飯，車吓我。」
古佩玲表示因為選港姐時還是大學生，未試過自己工作賺錢，得獎入行後賺到錢反而有成就感。問到是否不用向父母要零用錢？她說：「最近冇，都夠使，一出嚟做嘢就冇喇，呢個係第一步，希望將來都係靠自己努力賺錢。」對於落選港姐蔡嘉欣已有機會做主持，二人均表示羨慕，均大讚蔡嘉欣口才好。