第一場、第五班、一○○○米。韋達五歲馬「喜奔騰」，暑期已一早由貝力斯一手操住，十月初在騎者胯下出戰谷草千二米，突然同「印印腳」鬥燒之下，結果大敗十一個馬位跑包尾，之後換上利敬國縮落跑一千米，稍稍留住跑立即入Q位，兩場發揮有天淵之別；「喜奔騰」以往因為傷患問題影響以致出賽次數甚少，如今馬兒易廄後順利將健康養回，現居五班好着數，已屆出頭之時。
第七場、第四班、一二○○米。「成功星駒」父系為「星運來」，服役時曾經三度訪港，於香港瓶跑第五名及曾勝出女皇盃，而告別戰亦在香港盃上陣，當時不敵日本代表「愛麗數碼」跑第十一名，退役後初期在德國配種，其後被售到南非，並榮膺四屆南非冠軍種馬。「成功星駒」在港同父馬「任我行」擅長跑谷草，而且本身抵港後試閘表現持續見進步，今次有分頭可以一敲。
第九場、第三班、一二○○米。「正本雄心」上季已轉向谷草搵食，曾殺低「鄉村瑰寶」，今季一出喺谷草千二米僅敗於「醒目勇駒」，搏咗劑明顯唞耐咗，上仗於田草復出配希威森排十三檔，起步夾硬留到落尾，雖以第十二名過終點，但其實與領放馬「鑽飛鷹」逐步收窄距離，官方評述更指「以末段最為接近」，照咁睇「正本雄心」今鋪返主場上陣，機會重新樂觀。