■陳柏宇為粉絲簽名兼自拍。香港文匯報訊 陳柏宇（Jason）昨日假九展Music Zone 舉辦「陳柏宇《Anyone But Jason》首映會」，讓粉絲們可以率先入場欣賞 Jason為今次新碟所拍的MV三部曲，以Jason的三首新歌《爸爸的禮物》、《本能寺》及《最後一個收費亭》串連成為故事。大會更提供爆谷給入場人士，讓入場人士有入戲院欣賞電影的感覺。
今次的MV三部曲，Jason更拉隊遠赴新西蘭拍攝，並先後到過新西蘭北島不同靚景拍攝，包括Waiheke Island的亂石崗、Owhanake Coastal 及 Orapui Road等地，Jason亦不負眾望，Chok盡自己最型的一面去拍，讓 MV 中有齊靚人、靚歌、靚景，一次過滿足三個願望。
昨天的首映會並不單是播出Jason的MV三部曲，還有一場由 DJ 阿檸以 Jason 新歌的故事概念串連成的舞台劇，Jason更隨着舞台劇的情節即席獻唱新碟中的新歌，包括《化出個文化》、《金草莓》、《七折》、《橋下完一郎》及《爸爸的禮物》，歌與劇互相穿插其中，嶄新的演出方法為歌迷帶來不少驚喜。
昨天入場的歌迷除了有得食、有歌聽、有 MV 睇之外，完騷後，每位歌迷更可即場取得一張由Jason 親筆簽名的最新專輯《Anyone But Jason》，難得與粉絲見面，一向愛錫粉絲的 Jason 除了把握時間與大家交流之外，還與粉絲合照留念，實行滿足大家的願望。
騷後，Jason笑言：「就快聖誕吖嘛，最緊要大家開心！可以同大家唱下歌、簽下名、影下相、傾幾句，見到大家笑住咁返屋企，我都好開心！至於今次呢個首映會，希望大家鍾意呢個表演形式，唔使成日齋唱咁悶，哈哈。今次啲MV 可以畀大家聽到我啲新歌之餘，仲可以睇到新西蘭啲風景，真係好靚㗎！睇完都想再返去玩多次！」