■《王梓軒CROSSING 源•樂 演唱會》前晚圓滿結束。香港文匯報訊《王梓軒CROSSING 源．樂演唱會》前晚在會展圓滿結束，梓軒心存感恩感謝台前幕後付出的努力、觀眾入場的支持。而由於反應好，投資方已答應開part 2。
尾場有《多功能老婆》的金牌編劇監製陳寶華、黃浩然和于淼來支持，梓軒在場問現場觀眾有冇睇《多功能老婆》，全場大叫「有」，他笑說：「我明白寶華姐要坐喺中間，因為顏成功（于淼）同浩然坐埋一齊，可能畀人打，哈哈......」梓軒更感謝寶華姐寫了一個好劇，而且角色英文名與他同名，並有機會跟前輩梁舜燕合作。
今次慶祝入行十周年的個唱上，梓軒由籌備到開騷足足籌備了半年多，由傾歌到綵排時，每個人都有input，他在台上好感觸地說：「我想令大家開心，正正就係我哋演唱會最重要嘅其中一個主題，想幫大家一齊去尋找快樂嘅根源，過程之中，希望每一位重新去學習世界......」隨即邀唱《再生》。
覺得意猶未盡
梓軒到達慶功宴時滿場飛，與贊助商及台前幕後工作人員祝酒後，便啟動「食力」，他搞笑說：「終於可以食餐勁嘅！」
梓軒說：「兩場演唱會已經結束，我覺得有少少意猶未盡，大家啱啱先玩熟咗個rundown，所有表演團體已經熱晒身，表演得愈嚟愈好，雖然我自己想唱多幾場，但我覺得可以喺呢個時候開到兩場演唱會係非常之難得，因為我哋大家，全香港嘅朋友都係面臨近一個好困難嘅時間，但大家選擇去交託佢哋嘅時間，佢哋嘅快樂同精神畀我哋，而我睇到好多人離場之前，係有一種喜悅，有一種能量同希望，我覺得我嘅任務暫時完成，多謝所有入場嘅朋友，多謝所有台前幕後一齊拚搏嘅朋友，多謝傳媒朋友喺呢個時候咁正面去報道呢個演唱會，我哋公司上上下下都非常辛苦，由影片嘅製作去到拍攝，去到開會傾concept再去到達operation，去到我助手，每一位都出心出力，多謝你哋，多謝所有有參與嘅團體，多謝師傅趙增熹，多謝Jack、珊珊、阿達。今次未玩完，頭先都屈咗啲投資者，佢哋應承咗落疊，我哋下一站見。」