第三場、第三班、一二○○米。方嘉柏二○一○年以「綠色駿威」贏新加坡國際短途錦標，馬主李嘉俊捧盃相當雀躍，該駒退役後馬主曾養過「綠色快駒」，但就改交徐雨石訓練，直至今季終於有新馬「綠色勇駿」再同小方合作，當然希望好夢重溫。澳洲自購馬「綠色勇駿」當地三戰取得兩冠一殿，贏馬路程為千二米，上仗跑後復課立即安排試大閘催谷，今次趁有分頭買定先冇衰。
第九場、第三班、一四○○米。「勞動創造」係大馬主黃志祥兒子黃永龍擁有，呢匹沈廄馬上季來港第二戰跑到流鼻血，但之後季尾喺三班田草千二米爆六十二倍大冷W，當時殺得低「新力寶」、「聰明導彈」及「紅運大師」等駒都唔簡單；今季復出跑過兩場，當中剛役後上如飛跑第六名，走勢唔曳；復課上咗從化叉足電，今次棄同日勝途千二作加程千四，話唔定試出彩虹。
第十場、第三班、一六○○米。「加州大帝」由「加州」系御用買手吉田瑪莉於美國購入，周歲價三十二萬五千美元，之後運到愛爾蘭服役，由千二跑至二千米，來港前最後一仗於一哩取得頭馬，獲得進口資格，而且一早部署運港服役，在愛爾蘭出賽時或許未將其真正潛力盡露。路程方面，應以一哩左右較合腳法，上仗在港初出已後上追近，復課操好再來結合進步可亂大局。