自從電算機可睇到臨場巨額落飛馬燈號後，馬迷每場開跑前都會俾啲綠燈、啡燈攪到眼花繚亂，呢啲巨額落飛馬當然唔係隻隻都贏或入位置，但命中率高，好多時輸都會跑得接近。唔少馬迷已習慣睇實着燈馬搵啟示，望搭到順風車。跟燈賭馬係咪贏到錢就見仁見智，反而最令人好奇嘅係，夠膽巨額落飛背後，有乜神乎其技可以咁準預測賽果？落飛黨真身係本地或外地職業賭馬集團，抑或係非法外圍買返落馬會套戥，眾說紛紜。無論落飛黨係邊個都好，能夠成為馬場焦點，當然係因為呢啲聰明錢好多時都未卜先知，重錘出擊得手。唔少馬迷對早前嘅谷草夜馬總場次259場印象深刻，閘前一對「加州多寶」（圖前駒）同「紅運大師」獨贏瘋狂落飛，直情當原本幾隻熱門馬無到，呢對馬構成嘅連贏更加落到啡燈，最終賽果係點大家都知，但「加州多寶」獨贏得返七倍幾，足足無咗一半，條啡燈Q更加打到三百蚊都無。馬會過去一直都無正視落飛黨嘅問題，無疑落飛黨係真金白銀幫襯馬會，佢哋有中得好應，耐唔耐亦會損手，馬會最歡迎就係呢啲巨額投注。不過，馬會係咪應該研究吓，點解落飛黨經常計得咁準、賽果又同時間咁多巧合，落飛黨係咪掌握到一啲不為人知嘅內幕消息？另一邊廂，法國騎師彭國年喺元旦賽日開始客串兩個月，呢位新面孔第一日已交到成績，能否持續得到更多支持要睇多兩三次。今次彭國年獲發牌好大程度係時勢造就，咁啱三個外籍騎師因不同原因離開，騎師荒呢個老問題又再浮現。喺莫雷拉同潘頓二分天下局面，加埋田泰安同何澤堯，已包攬咗今季一半頭馬，另一半頭馬由其他十幾個騎師瓜分，可以想像競爭有幾激烈。本地騎師固然難搵食，外籍騎師亦唔好得幾多，唔計杜美爾季初因為家庭理由放棄牌照，李寶利同貝力斯都因為支持不足、成績唔好，情願去美國同返澳洲發展，提早斬纜不失為明智決定。另一個無得留低嘅沈拿，一直被人感覺都係默默耕耘、鬥志鮮明，難得今季得到新開倉嘅韋達支持有個好開始，好衰唔衰整單「與龍共舞」事件，被競賽小組重罰停賽十日，留下離港發展伏線。競賽董事小組罰沈拿，裁決完全正確，罰得重亦唔係問題，最令人唔順係小組罰人並無公平準則，對弱勢騎師好似沈拿同本地大師傅，就特別嚴格抽秤，攞位稍為進取揩到其他人，就即罰唔手軟。以前經常話香港馬場係騎師天堂，但係近年不斷有騎師撈唔掂敗走，惡性循環下，唔少歐洲頂級騎師喺馬季歇暑期間，情願揀去日本客串都唔嚟香港，原因不言而喻。未來一段時間，扣埋停賽同養傷騎師，剩低十幾個騎師可用，人手非常緊拙，馬會當然會繼續搵騎師，但想吸引好手客串都唔容易。