■「眾志」事事「反中國」，竟然賣內地口罩(紅圈示)。 「香港眾志」fb截圖「香港眾志」秘書長黃之鋒前日啱啱喺facebook發文宣稱喺海外搞到十萬個口罩，雖然運費比平時多付三四倍，但「眾志」聲稱會「自行承擔巨額運費，不公開募資」。不過，在宣佈售賣方法時，「眾志」突然提出三種定價，一款就叫購買者負擔運費，另一款最高標價嘅更講到明係要籌錢。唔少網民批評佢哋先領完「獨力承擔昂貴運費」光環，即刻換個模式就搞眾籌。唔知佢哋係見人鬧而轉軚，定係老天都睇唔過眼，噚晚開售前唔夠一個鐘，「眾志」突然聲稱僅售唔使運費嘅一款，更靜靜雞提一句因為網頁負荷唔到，但喺口罩發售安排嘅更新帖文上，就仍然堅持宣稱此舉係為咗「減輕普羅市民或有需要人士負擔」云云。
黃之鋒日前就喺facebook宣佈10萬口罩抵香港，並仔細描述一番過程幾咁艱難，又話「近期飛往香港的航班大幅減少，貨櫃位亦變得非常罕有，需比平時多付三四倍的價錢，才有航空公司願意承運」等等，然後話鋒一轉，佢就聲稱「即使如此，眾志也決定保持低調，選擇自行承擔巨額運費，不公開募資，讓香港人不用『捱貴口罩』」，遂將口罩定價為98元一盒。
呢番大義凜然嘅感人說話講完都未夠一日，眾志就喺宣佈口罩開售安排時設多咗兩個選項，包括128元一盒，由購買者「分擔運費」，理由係「讓眾志持續有足夠資源，為港人搜羅防疫物資」，同埋258元一盒，「希望行有餘力的人士，買口罩同時捐款」，而呢個收益需要扣除佢哋口罩成本，所剩先會捐畀「醫管局員工陣線HAEA」成立嘅「武漢肺炎防疫抗爭基金」。
網民譏賣罩都要拎光環
此安排一出，即刻被網民鬧爆。「Anita Wong」話佢哋「尋（噚）日先大義凜然話唔眾籌，今日就即刻換個模式搞眾籌，真係好核突」。「Yuu Yau」就直言：「賣罩咪賣罩囉，又要拎下光環。」親熱狗的「手作達人」吳斯翹（Billie Ng）亦話：「我鍾意捐邊個就捐邊個，做乜要畀錢佢拎光環？」
唔知係見到啲網民嘅反彈定係其他原因，眾志喺就要開售之前唔夠一個鐘時更改安排，喺一篇主要宣佈更改購買網址嘅帖文中宣佈改為僅設「$98一盒」的價格選項，又靜靜雞提一句呢個安排係「由於新設網頁無法把三種價格的出售量，限制在同一個限額中計算。」
不過，香港文匯報記者發現，佢哋喺之前宣佈口罩開售安排嘅貼文更改中就未提及上述原因，而係繼續攞彩，話「售價為$98一盒，由眾志補貼運費，減輕普羅市民或有需要人士負擔」，並將之前嘅捐款一說轉為，已諮詢「醫管局員工陣線HAEA」意見，稱醫護「難以使用民間募集的防護物資工作」，又藉機抹黑話「因一旦發生意外甚至不幸感染疫症，局方或以此為由，推卸保障員工的責任」云云。
趁賣罩抹黑內地商人「炒賣」
其實，作為一個「稱職」嘅「港獨」分子黃之鋒從不放過任何分化兩地、抹黑中國嘅機會。佢趁賣口罩不斷抹黑中國商人「繼續炒賣」、「幾乎壟斷全球口罩」，又有意分化兩地，續稱「港人採購工作可謂相當艱難。」同時大讚「黃色陣營的國際戰線一樣為香港人『做到嘢』！」不過，根據佢哋公佈嘅口罩信息發現，呢個事事「反中國」嘅人，買嘅口罩卻係產自內地，唔知對於呢點佢哋作何感想。 ■香港文匯報記者 文根茂