■ 溫碧霞出席巴黎時裝周。香港文匯報訊 溫碧霞（Irene）在巴黎完成首部法國電影《Happy Night》（暫名）拍攝工作後，繼續留下來出席巴黎時裝周，今次應著名品牌之邀欣賞秋冬騷，Irene選擇了淡粉紅Deep V吊帶紗裙睇騷，雖然初春的巴黎氣溫仍然寒冷，但因時裝騷正好在陽光充沛的下午時分舉行，氣溫和暖，再配上棗紅長身皮褸，穿搭恰到好處。
Irene已連續多年獲著名品牌邀請出席巴黎時裝周，今季感受特別深：「以前都會遇見好多香港及內地明星朋友，但今次因為疫情影響，到𠵱家為止我仲未遇到香港朋友，而內地藝人因為疫情未能入境，外國藝人就有好多，大部分都係來自東南亞、韓國、日本、美國、英國，所以都好熱鬧，只係冇晒熟口熟臉的朋友，希望集結大家念力，疫情快啲過去，大家生活回復正常，人人都有工開啦。」Irene並表示因為巴黎政府認為有病才需要戴口罩，而大家都好自律，拍電影及時裝周都沒有人戴口罩，甚至好難才找到口罩買。
另外，Irene主演的新片《墮落花》入圍《第15屆大阪亞洲電影節》介紹香港電影的特別環節「Special Focus on Hong Kong 2020」，Irene毋懼新冠肺炎疫情在日本擴散，如期3月12日起程飛往大阪，並會逗留玩幾日才回港。問她不怕日本疫情？Irene爽快說：「我都去咗巴黎喇，做足防疫戴口罩，帶定消毒用品就冇問題，最緊要每日做運動及飲多啲熱檸檬水，早睡早起，曬多啲陽光，增強免疫力才是最緊要。」