馬匹轉倉乃平常事，因成績未如理想而轉倉固然所在多見，多捷馬蟬過別枝亦未算新聞，所謂合則來不合則去，在賽馬世界可以說是常態。馬主與練馬師之間的交收，原本與馬迷利益無大關係，但有些時候見到一些馬轉倉後扶搖直上，卻也有多少心涼感覺。基本上作為一個不單純是投注者而是真正的馬迷，樂於見到馬匹交出本身應有能力而非蹉跎歲月。賽例中有太大灰色地帶，練馬師可以長期替馬匹報跑不合適的場地、路程作為部署中的一着，亦可以用不適合的配搭或是不理想的跑法，去將馬匹評分調整到在其心目中十拿九穩的水平，這是讓磅賽制下有人轉而追求利益，其實違反賽馬基本精神。擁有馬匹最終主權的馬主可以將馬匹轉倉算是撥亂反正的機制，馬迷都希望見棄暗投明的馬主，能獲得理想的回報，以確保這機制可以繼續運作，變相懲罰那些不求進取的練馬師。當然騎師的情況類同，但騎師更替涉及更多複雜的因素，不單純只是賞罰這麼簡單。
新型肺炎感染個案持續上升，馬會賽日已經無對公眾開放馬場，只有限度容許馬主或會員入場，隨住疫情變化幾乎每次賽事都會更新入場限制，一時就放寬少少，一時就再收緊到只係容許有馬出賽馬主入場，其實都唔可以怪馬會，喺疫情下要繼續維持舉行賽事，就要做足防疫措施。雖然呢段日子馬會有政策指明邊類人士可以入場，但具體執行時係咪真係咁嚴謹，亦都引起唔少人非議，特別係喺凱旋門拉頭馬，有唔少會員就不時見到啲非馬主人士在場，佢哋都不期然泛起一個疑問：點解呢類非馬主人士可以入場？係咪有啲人有特權？喺查核入場人士身份時，現實中必然存在灰色地帶。馬會賽日聘用嘅保安人員，有好多都係兼職，可以想像必然有部份入場人士被查核身份時，擺出一副不情不願嘅態度，保安員問多句都唔想答。保安員嘅處境亦值得同情，唔通要求佢揸到正一正、啄住個唔合作嘅馬會遴選會員，博人投訴？平心而論，不論馬主定遴選會員，入得場就應該守規矩同自律，好似近排有啲正接受家居隔離人士周街走，都有辦大家睇。喺呢啲非常時期攪破壞，俾人當面話你唔啱就無癮啦。同樣賽馬傳媒因工作入場，就應該安安分分專注工作，部份入場志在睇跑馬就應該留在家中。現時全球大型體育活動包括東京奧運，大多取消或押後，國際馬壇盛事杜拜世界盃賽馬日亦已宣布取消，馬會仍然維持到閉門作賽已經好難得。事實馬會做咗好多嘢抗疫先維持到跑馬，假若唔好彩有騎練發現確診，可以肯定會即時無限期停賽，公眾固然無埋僅存嘅娛樂，賽馬相關從業員亦會如酒吧業界一樣，面臨停業無收入嘅巨大衝擊。