「黃色優惠券」謀利 自殘博同情吸客 黃van台夾口罩廠騙財
泛暴派搞所謂「黃色經濟圈」，撕裂社會，把口話為咗支持者可以幫襯返「同路人」，身體就好誠實咁呃人。「黃圈」入面嘅「同路人」Leo近日就喺facebook發長帖，踢爆好多人都係借「黃色經濟圈」為名搵食，搞到「呃人嘅人多」，而「被呃嘅人更多」。Leo喺帖文入面又舉唔少例，好似「黃色優惠券」掛羊頭呃手足、黃店「自殘」吸客、深黃貨van台幫「本地口罩廠」呃人等事件，反映原來為咗喺「黃圈」呃錢，班「手足」可以幾私心盡現，激到唔少「同路人」都鬧爆班食血饅嘅「手足」必遭天譴。不過，要嗰班「不分化」掛嘴邊嘅「盲粉」識醒就唔係咁易喇！■香港文匯報記者黃書蘭
自稱係「IT狗」Leo爆料話，喺上年「黃圈」出現之初，曾經有一次「黃圈」聚會，雲集圈內所有「地圖」app平台搞手，傾點樣將所有app嘅「黃藍店」資料整合至共同資料庫，以便「同路人」能共同維護、互相認證，以減少資料出錯或者重複。
搞手各懷鬼胎 只想自己獨大
誰不知，呢班「地圖」搞手坐埋一齊，傾咗唔夠10分鐘就宣佈放棄。Leo踢爆呢班人都各懷鬼胎，只係想自己擁有最大嘅黃藍資料庫，以搞下啲咩「黃色優惠券」、去搵啲黃店畀錢贊助或者分成，「咁試問又點會願意同其他人整合呢？」仲話𠵱家啲「地圖」app學人搞外賣，「咪就係結果囉！」
至於所謂「黃色優惠券」，Leo就指「某 TG 家長車頻道嘅搞手」曾明言想搞優惠app以同黃店分賬謀利，只因後來有其他人搞類似平台，令到「喺連登畀人×到飛起」才作罷。
Leo又話，有一次「黃色優惠券」論壇請咗個所謂「區塊鏈專材（才）」嚟講解，點知成個座談會變咗淨係sell Bitcoin有幾好，blockchain有幾巴閉，只係「想sell自己搞緊隻coin囉」！
冇量力而為 做飲食搞美妝
佢慨嘆，「黃圈」偏離支持「同路人」嘅原意，而唔少「黃店」亦冇量力而為，好似「明明係做飲食，就走去搞美妝，明明做開零售，就走去整口罩。」「呢啲」店主又發現只要「間中畀人搞一次，推一推post」，就會「賺到好多和理非嘅同情」，於是就日日呻自己點樣畀人搞，令到香港出名嘅「黃店」只得三幾間，而呢啲「名店」為咗keep住名氣更會「自殘吸客」，然後啲小黃店則學樣「宣佈執笠」，呃人去支持，齊齊「自殘吸客」同流合污。
此外，仲有間喺「黃圈」知名嘅「深黃貨van台」，連「稍為FC一下（吓）就知間廠係打算呃人」都費事，幫咗間無知名度呃人口罩廠「背書」𠻹。