■陳恒鑌質問陳淑莊是否對得住醫護。陳恒鑌fb短片截圖攬炒派立法會議員陳淑莊前腳仲義正辭嚴喺立法會鬧人哋希望批錢做工程嘅人「點對得住啲醫護人員啊，叫你stay home啊」，跟手就帶住40人喺酒吧聚會，被質疑違反「限聚令」。民建聯立法會議員陳恒鑌噚日喺facebook發片話當晚警方收到噪音投訴，質疑佢哋究竟係開會定開party，建議佢攞CCTV片自證清白。好多網民就覺得佢根本係挑戰法律，要求政府一定嚴懲。
陳恒鑌喺片中話，自己喺立法會親耳聽到陳淑莊鬧人點對得住醫護人員，跟住就帶40人喺酒吧聚集。佢引述陳淑莊聲稱自己係開會而唔係聚會，陳恒鑌就一語道破話，事件當晚警方收到噪音投訴，而開會通常坐喺度傾偈，「正常唔會咁吵」，質問咁吵係唔係因為飲酒？「究竟係開會定係開party呢？」香港近排確診個案約70單，聚會飲酒唔係有好大感染風險？
促公開CCTV澄清
陳淑莊就同傳媒辯稱喺酒吧有照顧到防疫空間，陳恒鑌就話，有傳媒就踢爆間酒吧得1,300呎至1,400呎，除咗儲物，得700呎至800呎，40人喺度，點會有防疫措施。
陳恒鑌質疑陳淑莊嘅做法有機會感染，「如果感染咗，點對得住醫護人員啊！」陳恒鑌好希望陳淑莊可以澄清件事，如果可以，希望佢好似之前要求港鐵交8月31日嘅CCTV片一樣，叫酒吧攞片來睇下，唔係就真相大白啦。
同時，陳恒鑌又強調，特區政府都有澄清議員離開立法會後就冇咗豁免權，根本唔係好似陳淑莊所講，奉勸佢「唔好以為自己有特權。」陳恒鑌都希望政府嚴肅跟進件事，唔好叫社會有壞嘅先例，如果真係有人有樣學樣，就真係對唔住醫護人員啦。
網民：開會搵鬼信
「Judy Nairn」直言「夜麻麻開會？仲40人？搵鬼信！」「Chu Sung」就好嬲：「對住d（啲）不知羞恥的人真是嘥氣，仲要死撐。」
「Eric Chan」就話：「如開會，有議程，有記錄，甚至會錄音，有否提出這些證據？」
「Hing Ling Tsang」話：「佢明顯挑戰法律！一定要嚴懲！否則如何管治其他違法者！」「Mnnie Li 」都支持政府要跟進，都係嗰句「法律面前，人人平等。」
■香港文匯報記者 文根茂