■ 黃之鋒亂教人跳閘。 黃之鋒fb圖片自修例風波以來，「中箭（香港眾志）」秘書長河童（黃之鋒）就不斷煽暴，推人上街。近日，河童又再次喺facebook上亂教人跳閘推人坐監，點知就被熱血公民成員鄭錦滿揶揄佢未衝過閘就唔好亂教人，話好多「手足」因跳閘被告，「唔係你受，×噏冇成本，唔會感同身受，當然冇所謂啦。」「熱血公民」立法會議員鄭松泰亦都「教導」河童要自知「群眾真係會因為你一句說話而行事」，直言「責任在政治人身上」。
事緣河童日前喺facebook個人專頁，上載一張新版動畫《數碼暴龍2020》主角太一跳閘的圖片，然後配文稱睇數碼暴龍reboot嘅第一集，見到主角太一觸發勇氣紋章進入數碼世界，竟然係因為喺車站跳閘，指「作為香港人，睇到嗰下都覺得幾得意，好少見動畫將跳閘慢動作畫得咁型。好想幫佢用廣東話配返個唔幫襯『黨鐵』跳閘嘅廣東話版本。」
鄭錦滿：未衝過就別亂教
點知就被鄭錦滿連開兩個post鬧河童亂教人跳閘，叫河童未衝過閘就唔好亂教人，相上嘅跳閘方式會即刻被拉，有「手足」因為跳閘被告兩項普通襲擊，𠵱家喺荔枝角踎緊，「呢類個案，唔止一單，好多新聞都冇報，即管誤導人去送頭。」又鬧佢「唔係你受，×噏冇成本，唔會感同身受，當然冇所謂啦。」
不過，滿口仁義道德嘅鄭錦滿雖然喺post鬧緊河童送人坐監，但同時間自己都有教人違法跳閘嘅方法，只不過同河童嘅跳閘方法唔同啫，咪又係同河童一擔擔。
鄭松泰亦都叫河童身為「公眾人物」要自知，「因為群眾真係會因為你一句說話而行事，我接過唔少有關跳閘被捕的求助。貪得意的，不是追隨者，責任在政治人身上。」
網民「Johanna T. Che」批評飯民推人去死但又扮神，「嗰啲送頭專員×噏當秒（秘）笈，個個無經驗就爭住做軍師......成班泛民都係×街嚟，推人去死但又扮神。」「Man Kit Chong」就覺得跳閘唔抵喎，「完全唔明白點解要跳閘，唔搭咪得囉，巴士都好方便，無理由為左（咗）幾蚊比（俾）人告好唔低（抵）。」「Jacky Wong」就寸河童，「咪傻啦，你教埋啲傻仔去跳閘，距（佢）地（哋）係唔會進入數碼世界㗎。至多比（俾）人影條片上傳到YouTube，跟著（住）比（俾）人起訴。」 ■香港文匯報記者 郭家好