第五場「翡翠綠」今季一出即勝，之後上三班亦曾上名，重返四班分區隨時有權施突擊，值得優先考慮。「凌駕」上仗狀態未夠已經跑近，今次復課操足走勢更具吸引力，賺體力兼對手弱有力逞強。
第六場「美麗多多」出道未贏兩次跑第二名只係運氣使然，搏開未贏幕後不會罷休，佳態持續之下料總有出頭天。「愛添勝」在上手何良馬房無功，轉去賀賢馬房後三戰兩度跑第二名，今次重返田草長直路決心出頭。
第七場「無敵勇士」跑田草一千米未曾甩過頭三名，前次跑千二雖只得第三，但本身在直路走不利內欄跑綫，所以上名水準其實好高，上場重返勝途力拚僅敗得第二名不敵「佳景福星」，今次易配雷神決心贏番場。「加州神箭」近三場兩次跑入第三名，六歲馬季尾階段狀態復甦，今次繼續出戰直路賽有心拚個明白。
第八場「精簡最好」季內六戰千四米錄得三場勝仗，上場小休四個月復出可作開氣性質，磨利狀態季尾重新撻起，恃質出擊可優先揀。「行雲流水」由前女將而家做埋馬販嘅蔣嘉琦引入，馬匹今季來港迅即交出頭馬，陳嘉熙一連兩仗俱跑近，今次易配潘頓更具冠軍相。
第九場「博愛友威」上仗贏馬無疑有點受惠於前中段超快步速，得以讓其凌厲後勁順利展現，但也反映馬匹如今終於開竅，升上三班角逐也不輸蝕，挾新勝餘威可爭連捷。「精彩有你」初出熱身一場，之後多場跑入前四名，復課所見，大馬身輕兼走勢爽勁，十分吸引，今次同場既有重心馬分散注意力，有賠率更值博。
第十場「友好日子」出戰二班賽惡氣十足，只係健康搞到隻馬唔係好跑得，難得轉去姚本輝度食得瞓得又跑得，上場叮噹馬頭之下影相僅敗頗為不值，今次人馬捲土重來不容再失。「最合拍」今季頭三場獲兩冠一季，當中曾勝出一班賽事賀年盃，近兩場發揮未盡如意，但賽前贏好泥閘重新操起，有望取得季內第三勝。