香港文匯報訊 著名鬼馬填詞人黎彼得的作品膾炙人口，最近因許冠傑（Sam）的慈善演出再受關注，大家都回味他和Sam合作填寫鬼馬詼諧、琅琅上口的經典歌詞。《舊日的足跡》節目主持車淑梅邀請這位鬼才任嘉賓，分享與舊拍檔Sam合作的恩怨情「愁」。
黎彼得向來我行我素：「我小學五年班輟學，當年入咗一間印度行做工後，啲人知我冇英文名幫我改做Peter，從此我叫黎彼得，唔再叫黎成就，果然條命就冇咁苦！」年輕時的黎彼得鍾意聽偶像許冠傑的歌：「估唔到佢（Sam）喺《年青人周報》見到我寫專欄就話要識我，因為當時Sam為《半斤八両》填詞，有句『夠薑就揸槍走去搶』出現問題，佢發覺一個人寫詞唔足夠，要搵個拍檔，可能佢欣賞我古靈精怪嘅腦袋......」
黎彼得憶述：「點知我哋一合作就好似炸彈咁勁，好轟動！電影《半斤八両》12首歌首首都跑出。其實我哋付出好大，晚晚通宵傾偈度橋，我哋嘅相處就好似「乞兒與王子」，佢咁紅都當我老友約我去游水、釣魚......大家好合拍！佢教曉我好多，又介紹我去電視台做編劇，佢係我恩師！」
祝Sam開心健康
黎彼得又感慨二人關係的變化：「後來經過七年合作，因為輿論，我哋開始有唔夾，佢提意不如分開一下，呢次並非一廂情願（其實大家都有同感），因為（我哋）開始冇話題，冇偈傾，分開咗之後我自覺多咗存在價值，唔再依賴別人，唔需要人哋關照。」
淑梅姐問二人還是否有機會再合作，黎彼得表示沒有了：「大家已經係長者，唔好玩啦！過去就係過去，無謂再依戀......分咗手之後已經幾十年冇見冇通電話，最近Sam演出我哋都冇再聯絡......但係我希望佢健健康康！最難忘喺嗰度見到鐵絲網上由寫信佬寫上兩句『命裏有時終須有，命裏無時莫強求』，之後更成為《浪子心聲》嘅歌詞紅足幾十年。我希望佢（Sam）繼續做個開心人，因為我多謝佢Upgrade咗我，佢係我恩師！」