「川河尊駒」上年在克蘭芝一哩賽中成功衛冕。新冠肺炎疫情影響之下，今季可以維持馬照跑實屬難得，反觀外地好多國家嘅賽馬活動就全面停擺，部分既有大賽更先後宣布取消或延期，馬會原定越洋轉播受注嘅海外大賽日亦播唔成。同本地賽日一樣，每季越洋賽事嘅轉播日數亦有規定，早前取消轉播嘅空檔，馬會可以搵其他海外賽事來填補。全球疫情最近稍為穩定，歐洲地區開始陸陸續續復賽，部分賽事已初步定咗日期，外地大賽延遲舉行基本上無可避免，但係若呢啲賽事推到七月中以後，馬會就相當頭痛，因為政府規定馬會喺暑假嘅個半月，唔可以受注賽馬。若現階段外地訂出嘅復賽日期，因各種情況要進一步押後，可以肯定馬會無望轉播受注，公眾馬迷亦無得參與。平心而論，各行各業都受到疫情影響拖累，無人懷疑馬會財力，但今年整體收益亦一定縮水，雖然賽馬投注額無乜影響，但係足智彩同六合彩停晒，呢筆佣金收益其實好大條數，而馬會每年嘅收益直接影響慈善撥款數額，收益大幅縮減，慈善撥款點都無咁手鬆。馬會抗疫出錢出力，承諾唔裁員兼無申請政府紓困措施補助，政府都應該酌情開綠燈，今個暑假破例俾馬會用返今季嘅轉播限額受注海外賽事，唔係話要特別優待馬會，只係非常時期作出彈性安排，明白事理嘅人都會理解接受。
覆磅完畢派彩作實，呢句對馬迷來講係耳熟能詳，騎師賽後必須即時過磅，核對磅位無誤，先可以作實賽果，香港跑馬無可否認屬於世界前列，偏偏近排短期內一而再發生騎師唔知有無覆磅、唔記得去覆磅嘅情況，涉事騎師固然離譜，但競賽小組對唔覆磅形同若無其事，確實令人摸不着頭腦。早前皇太后盃賽後，莫雷拉同田泰安已經被發現唔知有無覆磅，競賽小組當時以睇唔出佢哋負磅不符為理由，求其一句譴責了事。小組呢個決定其實已經好大問題，係人都知負磅係影響馬匹勝負關鍵，香港跑馬彩池牽涉咁多錢，覆磅就係要保證無人喺馬匹負磅方面做手腳。事實上，過去亦發生過「鑽石海岸」贏馬後，騎師覆磅時負磅少咗，競賽小組直接取消頭馬資格嘅個案，覆磅程序有幾重要唔使多講，但係今時今日騎師唔覆磅，競賽小組竟然好似無事發生，由騎師低調過骨，話口未完，莫雷拉近期騎「活力寶駒」又再被發現無覆磅就返騎師室。莫雷拉係資深職業騎師，一再賽後無意識去覆磅，已經係全球馬圈嘅絕世奇聞，又唔係墮馬或者受傷，點會唔記得覆磅？競賽小組今次只係罰莫雷拉五千元，試問罰款有乜阻嚇性？如果其他騎師一再無去覆磅，會唔會罰幾千蚊就甩身，肯定唔得啦，希望未來賽事監察做好一點，否則只會一次又一次鬧出大笑話。