■ 唐詩詠認為點讚都不代表什麼。香港文匯報訊 （記者 梁靜儀）唐詩詠昨日返回將軍澳電視城拍攝新劇《超能使者》，問到有否留意契哥的「明湯戀」，她說：「點會留意唔到？我個幾月前已經估到，佢哋自己都講話冇避忌，（你點知道？）我收到各方消息啦，我有同（林）子善傾，子善話想問佢，我話唔好問，畀空間佢發展，等佢親口同我哋講。（馬明有冇親口同你哋講？）我哋太了解佢，佢唔會講，佢用Emoji（表情符號）代替（回答）同講多謝，我哋都係睇報道先知，都為佢開心，不過子善就有啲嬲，因為佢冇親口講。」
說到她未有讚好馬國明的IG及留言祝福，詩詠認為點讚都不代表什麼：「大家畀社交媒體影響太深，鄭嘉穎開咗IG兩年，我都冇畀過like，黃翠如我都唔係每個帖文都點讚，我同七成朋友喺IG都係零互動，點讚係代表乜？（為何會寫佛偈？）同馬明件事無關，只是覺得段文字有意思。」問到是否祝福馬明？她笑說：「當然啦，我都祝福佢哋，我好開心今年太多喜事，子善個BB出世，嘉穎又再做爸爸，佢（馬明）又終於拍拖，下一個應該到（黃）嘉樂。（你呢？）再下個就係我喇。」不過詩詠直言若再拍拖不會公開，因要睇另一半，對愛情她盡量低調。
問到她對此事表示好開心，是否因與馬明傳了多年緋聞，現在終於可以「甩難」？她說：「做兄弟冇所謂，都講咗咁多年，佢應該請我食飯補償我，佢兩個要煲靚湯畀我飲。」笑問到對方可適合做阿嫂？詩詠笑說：「佢揀邊個都冇所謂，最重要係開心，佢同佢媽咪鍾意就得。」