早前馬會轉播英國二千堅尼，古摩亞陣營「航空首都」即使跑贏大熱「呂宋火山」，但仍以頸位之微不敵「佳明驥」飲恨獲亞。好彩去到翌日同樣喺新市場馬場舉行嘅英國一千堅尼，古摩亞、岳伯仁同埋莫雅呢個鐵三角組合終於威番次，佢哋三歲馬女Love贏出呢項一級賽，賽後呢位名牌練馬師更指出一千堅尼只係Love嘅開始，佢相信嚟緊嘅英國橡樹大賽更合呢匹馬女發揮。
現年五十五歲嘅前香港冠軍騎師霍達早前攻下佢喺澳洲首場一級賽，證明自己寶刀未老。而另一位馬迷熟悉嘅沙場老將巫斯義，一樣保持唔錯成績，日前佢就去咗吨k婿李寶利嘅祖家意大利，夥拍Brasilian Man出戰三級賽安布魯西亞錦標，末段與早排去咗日本客串嘅法國美女騎師麥晴欣坐騎Walderbe大鬥法，結果五十三歲嘅老巫鬥贏廿四歲嘅欣欣，呢啲咪叫功架囉。不過，雖然鬥輸俾巫斯義贏唔到三級賽，但麥晴欣都好大方，賽後喺自己社交平台分享該場賽事片段，除咗話鬥得好精彩，亦有恭喜巫斯義，更話明會喺稍後舉行嘅二級賽米蘭大賽同巫斯義再鬥過。