■Sammi(左)昨日在老公宣布復出後首度現身，亮相無綫節目。香港文匯報訊（記者 梁靜儀）許志安（安仔）去年四月背住太太鄭秀文（Sammi）出軌，偷食黃心穎鬧出「安心事件」，所有工作即時煞停，「壞了」的安仔經過年多時間「修理」後，日前終於復工，而當日選擇原諒安仔的Sammi，昨日在老公宣布復出後首度現身，直言「安心事件」令安仔改變很大，變得更踏實，她認為夫妻就要一齊承擔，並有感而發說：「我有時覺得『躀』低一鋪都唔係唔好嘅事，當然過程係好大痛苦同慘烈。」
近年甚少亮相無綫節目的Sammi，昨日先與蔡卓妍（Sa）到電視城為鄭裕玲（Do姐）與農夫主持的節目《Do姐有問題》擔任嘉賓，就連Do姐都在社交平台分享合照並留言：「今天有稀客！」
之後Sammi再到北角為電影《聖荷西謀殺案》宣傳，雖然工作忙碌，但Sammi精神看來不俗，更大方談到安仔，問到安仔日前復工受訪問時，提到她有給予鼓勵時感動得眼濕濕，問到Sammi是否給予很大支持？她說：「冇乜刻意，大家都住同一間屋，一步一步啦，佢始終要出嚟面對群眾、面對呢個世界，自己承擔返自己嘅事係必然一步，佢有問我意見，我同佢講，自己去諗，因為係你自己去面對，畢竟件事都年幾喇，ready 嘅時候就去做，要練好首歌先，呢啲重要過復唔復出，總之支持佢。」
她續稱經歷這件事後，安仔怎樣去面對自己及群眾是不容易的，對他是一個很大的心理關口，他跨過呢一步，都很替他高興。問到可有看過安仔的訪問片段？Sammi表示有看過，並說：「覺得佢表現都OK，事前我叫佢表現要自然同真心，呢一年有咩感悟就表達出來，要畀人明白佢嘅心路歷程，一切要發自內心，評語係好難控制，毋須介懷，我戥佢高興同安慰，跨過呢步係唔容易。感覺佢輕鬆舒服咗。」
見證安仔變得更踏實
二人過去一年經歷了不少，問到感情是否也跨進一步？Sammi說：「唔敢話跨唔跨過，總之係要一齊面對，一對夫妻任何一個出事，都要一齊承擔同面對，呢個就係婚姻同關係入面要學習嘅階段。」問到Sammi是如何做到？Sammi直言信仰是她的支持：「因為當時好快又要做演唱會，專注演唱會幫我好多，做完之後休息再慢慢整理自己，大家唔使擔心我，我唔會揼心口。」Sammi又稱十年前信仰改變了她的人生觀，這件事令她更成熟，而安仔亦改變很大，她作為身邊人感覺最強烈，觀眾就要慢慢去感受他的改變同進步。她又有感而發說：「有時我覺得『躀』低一鋪都唔係唔好事，我以前由『臭four』到現在都改變好多，係一個階段，當然過程係好大痛苦同慘烈，但當回望過去就會覺得好好，因為會變得更好，會覺得值得。安仔最大改變係變得踏實咗，同認清生命乜嘢係最重要。」