所謂「以利而合者，亦必以利而離」。所謂「黃色經濟圈」一開始就是食人血饅頭賺錢，但過去一段時間，「黃店」接連倒閉，當中因利益而衍生的內訌和醜聞亦越揭越多，近日就有攬炒派組織「勞工組」揭發膳心小館即時解僱「手足」但不肯賠代通知金，反而「老屈」員工自己離職；「黃店」龍頭之一的「渣哥」假民主「公投」結果激怒「黃絲」，再搞出連場公關災難；富東閣海鮮酒家賣慘推銷片皮鴨，「黃絲」卻不幸中伏購入「厚切片皮鴨」；更有「黃店」至倒閉一刻，都不為「黃絲」所知，更有「黃絲」直言︰「而（𠵱）家個時勢就算自己人告急都難做。」
■香港文匯報記者 鄭治祖
兒戲自嘲拒道歉 寸嘴「渣哥」抽火水
「黃店」公關災難一浪接一浪。「黃店」「渣哥」早前喺公投舖位一事被揭發內定結果假民主，火速刪晒相關帖文同封鎖畀負評嘅網民，激到「黃絲」發起罷食。「渣哥」fb專頁近日就有個自稱admin（管理員）嘅人出post，話全公司都覺得「渣哥」老闆今次做得唔好，故即日起fb由admin接手，放返被封鎖嘅網民出嚟，「渣哥」老闆亦會被「噤聲」一排，等佢「感受被封鎖嘅感覺」喎。不過，網民似乎唔多受落，更發現呢個「聲明」係自訂分享對象，加埋呢個所謂admin寸網民嘅風格似曾相識，質疑所謂換admin到底係咪一場假象。
話說呢個自稱「渣B」嘅admin發咗篇「Block ×渣哥」聲明，聲稱因「渣哥於網上連環失手」、「上上下下都表示渣哥今次真係×咗」，故「渣哥」老闆即日起唔可以喺fb出post或留言，同時解封之前所有被封鎖嘅網民，但就戴晒頭盔話如果覺得留言係人身攻擊或粗言侮辱，將來都會封鎖返喎。
自稱易主管理 網民批辱智商
知衰但又唔見當事人出嚟為封鎖「黃絲」道歉，仲突然跑出個自稱admin嘅人話會解封網民，真係小朋友玩泥沙都認真過佢。「Lai Kwan Wong」就覺得篇聲明係侮辱大家智商：「好×似d（啲）小學生，一時絕交一時做friend......宜（??）家衰左（咗），仲扮晒野（嘢）話咩要block（封鎖）渣哥，你當人地（哋）三歲細路？」
「手作達人」吳斯翹（Billie Ng）就話：「將所有立壞心腸做的壞事，講成好像不小心的『×咗』，就可以過關。你們真是垃圾來。」「Michael Leung」就點出事實：「旁人睇，覺得你出個post幽自己一默好搞笑，但對於被block嘅人，我覺得呢篇聲明令人睇完好唔舒服。好多位膠化地玩弄黎（嚟）掩飾同偷換實際行為，而成篇文其實誠意相當欠缺。明白要急救公司，但呢種有目的性而以自我利益為主調嘅行為令人睇完好反感。」
「Lee Samson」就發現：「其實呢個POST都唔係公開既（嘅），自訂分享對象，仲Block緊既（嘅），有咩好講，被禁既（嘅）睇唔到，睇到既（嘅）都係本來支持你既（嘅）。」「Na Ad」就好奇：「做咩（留言）唔比（畀）貼圖，驚我地（哋）貼太多你嘅罪證出黎（嚟）？」
屈收錢畀負評 唔啱傾即趕客
呢位admin聲稱自己「比較溫和」、「Style（風格）同渣哥完全唔同」，點知佢同「渣哥」老闆一樣咁寸。盲撐「渣哥」嘅「Wangwai Lee」要求：「惡意留言block ×佢啦」。admin就暗指網民收錢畀負評：「算啦，佢哋都係收錢打份工。」搞到「Darko Chan」即刻質問：「咩意思啊？打咩工啊？」「Kristy Lam」亦問：「仲講d（啲）咁既（嘅）野（嘢）？」「YUfish」就火滾：「咁寸我以後一定唔幫襯。」點知admin回應：「黃店何奇（其）多，你咪去第二間嚕（囉）。」真係「溫和」到嚇死人。
「熱狗」陳到就質疑呢位admin嘅身份：「admin培植人嘅嘢，你信就信，唔信就唔信。渣B真身係咩人，邊個知？」「Kisspy Ho」就揶揄：「自己可以扮幾個角色互相傾計（偈），冇生意時都唔會悶了。」「jamie」就擔心：「小心扮耐咗患精神分裂呀。」 ■香港文匯報記者 鄭治祖
片皮鴨變「厚切鴨」 盲粉中伏照死撐
「黃色經濟圈」近來一再呈現疲態，好多「黃店」靠賣慘博同情搵食，但啲「黃絲」幫襯後，都頂唔順要踢爆佢哋嘅劣質食物。其中，「黃店」富東閣海鮮酒家逾半月前就喺facebook話：「今個月又冇錢交租出糧，靠各位大俠喇。」當時唔少「黃絲」仲留言話會撐佢哋。不過，撐完之後就負評如潮，呢兩日就有人連名帶相喺facebook群組公開寸佢哋嘅片皮鴨好厚，好快就吸引到批苦主申訴，話佢哋食物質素確實每況愈下，貨不對辦、份量少，而且賣相欠佳。不過，「黃絲」盲撐並非傳說，直情話只要係「黃」，「屎都好食」𠻹，真係令人震驚。
富東閣海鮮酒家上月底喺facebook賣完慘之後，隨即喺本月初喺facebook推特價片皮鴨，話星期一至五嘅片皮鴨「一食」賣168蚊隻，諗住吸引啲「黃絲」光顧。活動進行咗約半個月，前日仲喺facebook自吹自擂話：「最近香港出現了『片皮鴨』風潮」，感謝街坊支持，成為佢哋「『片皮鴨』嘅粉絲」，跟住又做廣告，仲扮大方叫啲人「懲罰」其他店舖𠻹。
不過，佢哋個post出咗幾個鐘後，就有人喺facebook群組「沙田之友」拆台，post晒佢哋嘅特價片皮鴨廣告同埋現實中嘅「厚切片皮鴨」。睇相盒片皮鴨份量約莫10片，塊皮縮晒水，啲肉睇落乾之餘又切得厚，個網民就話「好像有啲......厚，說好的片呢？」而呢個post好快得到好多人響應，「Damond Mui」揶揄「點睇你都係嗌咗燒鵝。」「Ken Tong」就覺得萬幸︰「好彩冇買。」
「Cold Super」就話：「其實做餐飲真係要靠口碑......我都一直有撐佢，但出品真係每況愈下，太忙太多order（單）跟（根）本唔係藉口。」「Ah Ting 」就寸佢哋貪心︰「其實 handle（處理）唔到，真心唔好接咁多order（單），見到佢一日接百幾隻都估到係咁，唔敢叫，唔想幻滅對『黃店』既（嘅）印象。」
「只要係黃，屎都好食！」
不過，點都會有啲「黃絲」會盲撐，「Suki Ma Fat Pepe」就話佢哋係食「黃店」：「要正宗就唔係食佢喇！」「盧欣欣」仲唔小心講咗真話：「黃店只係間商舖既（嘅）政見立場係『黃色』啫，邊個話包『黃色』同質素係掛鈎？包好食？包品質靚？大把『黃店』品質差過佢！」「Fat Pepe Fanny Yu 」更誇張：「只要係黃，屎都好食！」
「Don Wong 」慨嘆：「班戇×仔真係俾人呃極都唔醒個（㗎）喎！」
■香港文匯報記者 黃書蘭
「炒人」錄音通晒天 「無糧」小館終認衰
「黃店」膳心小館炒「手足」唔畀代通知金，事件喺「同路人」揭發下引發滔天巨浪，一度堅持個「手足」係自己走人嘅膳心，面對「勞工組」放出炒人錄音，最後只能認衰道歉，話「很不幸，經理確認有此對話」喎。喺事件中俾膳心支持者揶揄係「屈唔到航空公司錢的廚房佬」嘅「香港廚師聯盟」主席吳志輝亦話，要重新思考「黃的定義」喎。其實大家都是「同路人」，何必分得那麼細。
攬炒派嘅「勞工組」早前踢爆有「手足」喺膳心小館做全職樓面，但喺7月28號突然俾總店經理告知即炒，「手足」8月8號返去拎返最後一期人工時，竟然被反屈係主動辭職，剝削7天代通知金，仲要扣埋佢6月嘅500蚊獎金同逐分鐘扣嘅遲到罰款119蚊。
事件被揭發之後，唔少人都鬧膳心無良，但就有膳心陣營嘅網民「Danny Ma」話，膳心一再叫「勞工組」畀資料，但「勞工組」就「一直唔畀」。同樣有介入事件嘅吳志輝，「Danny Ma」就揶揄佢「都係屈唔到航空公司錢的廚房佬乍（咋）！」
遲來的道歉 「黃絲」唔收貨
點知，事件峰迴路轉，「勞工組」又真係攞到段錄音聲帶出嚟，仲放咗上網。呢段錄音記錄咗本月11日事主致電膳心總店經理楊先生嘅一段對話，入面講到得好清楚「炒咗」，令膳心無得再賴，只能夠死死氣地道歉認錯︰「對於『勞工組』上載聲帶後，我們確認是經理的聲音。已即時和經理聯絡，再三確認是否有該段對話。很不幸，經理確認有此對話。我們會於8月17日辦公時間內，補發出代通知金。同時，就此向事主及各位朋友道歉......」
唔少網民都睇唔過眼「黃店」嘅行為。「TJ Cho」斥責︰「愈講愈衰，依（𠵱）家攞個經理出黎（嚟）講有用咩，你地（哋）唔保護員工，有咩事就推佢地（哋）出黎（嚟）頂，仲請咩『手足』呀。」「Hilbert Chan Hiu Lok」話︰「你出曬（晒）文講係受害人自己走！而（𠵱）家假惺惺道歉sorry，你可能係『黃店』，但你更一定係玩弄僱員的×街僱主！」「Caroline Tse」亦質問︰「點解有楊經理嘅錄音對話係不幸？因為大話已經被拆穿？」
俾人話係「屈唔到航空公司錢的廚房佬」嘅吳志輝話，呢次膳心事件令佢有好深感受，「黃的定義要重新思考......原來我太天真，更想不到是，對方不斷用律師去壓工人，大有恃勢欺人姿態！之後就不斷在網上人格謀殺，再找名人，說是做和事佬，實則想你收聲！」其實「黃納粹」呢個問題都唔係第一日啦，大家不如早啲認清事實。
■香港文匯報記者 郭家好
「黃絲」不識「同路人」 奀舖告急照執笠
疫情重創經濟，唔少略有名氣、喺黑暴期間靠食血饅做到風山水起嘅「黃店」，近日都相繼執笠，更遑論一啲唔出名嘅「小黃店」。鴨脷洲嘅「順發粉麵」噚日就喺facebook發帖，聲稱今個月30號租約期滿後就停運，有「黃絲」網民先驚悉原來佢係「黃店」，亦有網民有心無力，話經濟咁差都冇能力幫襯。以前「黃絲」講「黃色經濟圈」嗰陣十足鴻圖大計，原來都係得個講字。
「順發粉麵」成個fb專頁得兩個post，其中一個已經係噚日宣布執笠嘅post，睇嚟真係冇名氣又冇人氣，難怪住喺香港仔嘅網民「Michael Sin」會話：「原來係自己人！」「Kelvin Wong」就有心無力咁話：「真係唔知，不過而（??）家個時勢就算自己人告急都難做。」
其實由「黃絲」搞嘅「終極黃藍地圖」有將「順發粉麵」分類為「黃店」，話佢喺修例風波期間有參與罷工，去年區議會選舉亦只貼上攬炒派候選人嘅海報。
雖然呢間小店個名都有出現喺「黃店告急」嘅fb專頁，但估唔到就嚟執笠都冇人知佢係「黃店」，睇嚟「黃絲」當初話要搞「黃圈」嚟「杯葛政權」同打擊「藍店」，真係下巴輕輕，信佢嘅「同路人」都係死路一條。
其實近日一啲龍頭「黃店」都捱唔住，好似「光榮冰室」葵涌分店早幾日已結業，不過有啲賺到盆滿缽滿嘅「黃店」就嫌賺唔夠，日日喺度告急，少少客都唔想蝕畀其他細「黃店」，難怪近日啲「黃店」排住隊執笠啦。■香港文匯報記者 鄭治祖