■香港民意研究所日前公布「去留民調」。香港民研fb視頻截圖香港民研「砌過條數」先公布 網民拍手「眾望所歸無得留低」
比民意更飄忽嘅，應該係攬炒派嘅民調可信性。傳統「飯民」得知立法會可以延任一年之後，紛紛想留喺議會，但日前聲稱要「幫」社會「尋找答案」嘅香港民意研究所，噚日公布嘅網上民調結果就顯示63%「民主派」支持者都唔想議員延任，但就啱啱好略低於佢哋之前定嘅三分之二條線。成班「主留飯民」被打臉，香港民研總監鍾庭耀唯有自閹話網上民調冇電話民調咁可信喎。有網民就幫「飯民」設計對白話「哎呀！今次個結果好接近呀」、「我聽到好多人想我哋留低。」■香港文匯報記者 鄭治祖
「民主派會議」召集人陳淑莊日前話經商討後，大部分議員都傾向延任，但就話會繼續緊貼民意輿情，盡量求同存異、達成共識喎。香港民研個「我們香港人」計劃名譽總監梁啟智日前亦口響響，話要就「民主派」去留做民調，「適時幫助社會的需要尋找答案。」
鍾庭耀早幾日都仲話，議員可以自行決定跟隨民意嘅門檻，例如設喺全民過半或「民主派」支持者三分之二度。當日已經有人驚個民調「唔準」，而鍾庭耀亦拍心口話可以分析不同組群的意見，仲話操作唔難??；香港民研個副行政總監鍾劍華亦話，「民主派」可以「彈性參考民主派支持者的傾向」。
6.3萬問卷抽起3.6萬份
點知，一班「抗爭派」係咁動員網上做問卷，再加上黃絲被攬炒論洗腦，噚日公布嘅結果，竟然有63%「民主派」支持者反對延任。呢個數據都非常用心良苦，啱啱好低過佢哋之前話決定性嘅三分之二，而且已經喺近6.3萬份問卷中，扣咗近3.6萬份問卷咁多，幫班支持者睇清楚嗰近2.7萬個「可信意見」。
為咗令件事更可信，香港民研同時電話訪問咗1,020人，最終就得出整體受訪者中，41%人反對延任嘅靚數據嘞，得咗。鍾庭耀噚日喺記者會上，都建議大家信電話訪問個結果多啲。
不過，「民主派」支持者同整體受訪者又點係同一個概念呢？唔少記者都問返香港民研，電話訪問中「民主派」支持者數據係點，問多幾次，終於有人答，原來都有61%反對延任，得19%支持，個比例明明差唔多。咁到底係網上民調唔可信，定係佢哋唔想市民相信某啲數據呢？睇嚟，佢哋咁辛苦幫社會搵到嘅答案就係「唔好相信我個答案」。
結果咁肉酸，班「飯民」議員噚日都不約而同唔提今次嘅民研結果，至到噚晚9點，都只係得民主黨主席胡志偉、「議會陣線」毛孟靜同朱凱廸做死士回應，結果當然被網民轟到變炮灰。
「飯民」想兜即被窒
胡志偉就話鍾庭耀都承認研究有局限，所以鴿黨籌備緊一個「決定性嘅民調」以處理去留問題；毛孟靜就引述相關報道，但只係講整體數據；朱凱廸就發文話估唔到網上群組同電話訪問個結果咁相近喎。
「Yuk Chan」就話毛孟靜：「哇睇清楚啲原來你計埋建制既（嘅）總票數，肉唔肉酸啲呀？民主派20%：63%，無嘢好兜啦！」「cecilia yu」就叫朱凱廸：「你之前唔係帶頭辭職？依（𠵱）家有晒民意撐你，我支持你第一個走！」「Shirley Wong」就拍晒手：「眾望所歸，無得留低，民意反影（映）最真實！」「Cherry Lam」就回應：「無得唔走啦，不過民主黨肯定又唔認數。」
網上討論區「連登」就有唔少網民幫「飯民」設計對白。「金罐頭」就話：「哎呀！今次個結果好接近呀！」「葡萄子」就話：「我聽到想我哋留任嘅聲音大啲！」