■伍健偉指如果一周後「like」數仍不及立法會議員何君堯將辭去職務，被不少同路人圍插佢「瀆職」、「弱智」。 fb截圖「好嬲」讚好少過何君堯 同路人圍插「瀆職」「弱智」
有時正常人真係好難明白「黃絲」區議員嘅邏輯，好似曾參與攬炒派搞嘅所謂「初選」，但facebook專頁讚好數目一直排包尾嘅「天水連線」元朗區議員伍健偉，日前突然喺facebook話「好嬲好嬲」，當大家以為有乜令佢咁嬲，說穿了原來係自己唔夠出位，其facebook專頁讚好數目「太少」，所以就無啦啦話如果一個禮拜後「like」數仍不及立法會議員何君堯嘅13.8萬個，「本人將辭去區議員職務，日後絕不從事任何政治工作。」唔少同路人見佢拎自己嘅議席嚟要挾手足讚好，圍插佢「瀆職」、「弱智」。■香港文匯報記者 黃書蘭
伍健偉前晚喺facebook發帖咁講：「好嬲好嬲......最多人like（讚好）的新界西政治人物竟然係何君堯......由今日8月26日23:00開始起計一星期，如果本人專頁的支持者仍低於何X（何君堯）138,542讚好者，本人將辭去區議員職務，日後絕不從事任何政治工作......我決定用like（讚好）去賭......到底香港人係相信白衣人無差別恐怖襲擊，定係信......林卓廷帶隊去元朗，互相毆鬥。」
王百羽批情緒勒索
攬炒派元朗區區議員張秀賢隨後好快就喺facebook發帖回應：「參與政治或社運都係建基於我自己嘅理念同信念，而唔係搞like（讚好）數。如果唔係，個Page（專頁）唔會咁多年都4萬like（讚好）都未到......最憎啲亂開空頭支票，政治立場不斷變化嘅政棍。」雖然冇開名，不過係人都知係明寸伍健偉參政不顧理念，話辭就辭。
攬炒派元朗區區議員王百羽則連發多帖鬧伍健偉情緒勒索、食人血饅頭、「劣化」政治表態，佢話：「見到伍健偉因為自己page（專頁）like（讚好）少過何Ｘ（何君堯）而好嬲好嬲，嬲到用7．21同辭職當情緒勒索去呃大家like（讚好）自己page（專頁），同事之間問返又賣關子原來『無諗住』真係辭職嘅......係咪食開人血饅頭，以為次次冇人出聲就可以咁食法？」、「而（𠵱）家你再用人血去換自己個page（專頁）嘅like（讚好）」、「要賭就賭自己條命！」
攬炒派灣仔區議員梁柏堅就叫伍健偉「自重」，佢話：「情感勒索要人like page（讚好專頁）嘅係叫政治操作......肉酸！」民主黨觀塘區議員梁翊婷亦揶揄：「真係有抗爭意志到呢，用人哋上庭坐冤獄機會購買到7萬個人血Like，好成功呀伍健偉先生！」
不嬲同攬炒派好friend嘅學聯前常委張朗軒更發起「拒絕情緒勒索，Unlike伍健偉facebook」，話伍健偉喺大家狂轟佢視民主選舉民意授權於（如）無物時，琴（日）發晒脾氣改埋tg名做「唔鐘（鍾）意千其（祈）唔好like」，「X你咁多人鬧你仲唔X檢討下仲要X番（返）人轉頭，X你老母啦！依（𠵱）家議員玩like定議事呀？大家X你就係（喺）到（度）發脾氣，心理質素差過打工狗，點樣同大家一齊頂住政府打壓？」
網民轟視「民意授權」為無物
但同為攬炒派嘅離島區議員王進洋就話撐硬伍健偉，但就透露對方想縮沙：「琴晚都打左（咗）比（畀）佢，伍健偉應承左（咗）我會出post（帖）叫大家unlike（取消讚好）返佢個page（專頁），因為我都唔敢苟同佢做法！」
唔少網民都狂轟伍健偉視民主選舉「民意授權」為無物。「Kyle Cheung」話：「一個重視民主價值的人係唔會輕易用like（讚好）去賭自己個議席......」「Shu Shu Fong 」就覺得佢愧為公職人員：「選你出黎（嚟）果（嗰）d（啲）選民真係慘， 比（畀）你咁利用黎（嚟）呃like（讚好）發老脾！下星期唔夠like（讚好）數記得唔好食言呀！無謂浪費d（啲）稅金係（喺）你身上啦！」
「Mok Chit Wai」就覺得輸贏將反映「黃絲」嘅水平有幾低劣：「拿自己的議席當低級賭局的賭注，勒索同路人......這是瀆職......這是弱智......如果最終伍議員賭贏......只是反映我們的水平有多低。」