如果有個員工講到自己好叻，但佢經常曠工，做老闆嘅你會唔會同佢續約？明明近日大批「民主派」支持者都叫傳統「飯民」議員唔好延任，但呢班「主留飯民」就夾硬嚟。日前，由民主黨（白鴿黨）積極參與嘅民調終於公布咗「專家」「精心設計」嘅標準，同日白鴿黨就趁熱追擊，喺facebook圖文並茂大講佢哋留喺議會對「抗爭」嘅「好處」。「人民力量」嘅快必（譚得志）就貼出白鴿黨議員啲會議出席率拆台，寸佢哋「抗爭」都要出席先得，仲貼埋白鴿黨黨員慘淡嘅出席率。結果講講吓，兩黨嘅支持者就嘈晒交，仲對延任議員列咗一堆工作要求，睇嚟班「主留飯民」要服侍呢班「黃絲」都唔容易。
白鴿黨出post講佢哋過往嘅「功績」及延任嘅「好處」，例如班議員因為上街「抗爭」孭咗幾多條罪、佢哋可以將啲議案拖到幾耐、留喺議會對「國際線」嘅作用等，仲搵咗好多外國議員杯葛國會後嘅「慘況」，佢哋想留任嘅心世人皆知。
白鴿黨副主席羅健熙都轉發帖文並承認自己覺得真心要留，話對於部分講「咁你即係決定留啦，仲講咩民調」或者類似意見的人，「我想話俾（畀）你知，我地（哋）正正就係話俾（畀）市民知我地（哋）點解覺得要堅守立法會戰線、去說服人，然後再去由市民決定。我覺得呢種民主實踐好值得去做呀。」
涂謹申出席率僅53.19%
不過，佢哋啲理據真係站得住腳嗎？眼見慢必決定辭職，快必就冇晒顧慮咁直接貼咗白鴿黨涂謹申過去4年嘅「成績表」出嚟，寸佢哋話自己都「支持」白鴿黨「抗爭頂住惡法」嘅，「但係大佬呀，你都要出席，先有得抗爭㗎」。原來綜合立法會過去四年所有會議，涂謹申出席率只係得53.19%。
快必就「提議」不如延任議員要承諾出席率達90%，99%就最好。網民「Yaakov Su」就認為90%太少，應該以慢必99%嘅往績為標準，但快必就「擔心」：「咁樣會唔會太自大？」「Yaakov Su」就質問：「自大？香港人工作嘅基本要求嚟，有咩其他職業係可以曠工而唔被炒嘅？」
「Jamie Tang」就建議：「計我話，議員應該逐次解釋缺席嘅原因，令大家滿意為止。」「Bill Lo」就話：「呢份係正工，冇人睇time card（出勤），冇人查，十皮嘢，出街有人叫honor（榮譽）」。
鴿粉反咬唔見慢必上前線
白鴿黨嘅支持者當然要還擊啦，好似「Ling Shek」就想做和事佬：「唔好成日攞返以前嘅嘢出嚟挑剔，如果有個小朋友佢爸爸係殺人兇手，你係咪要成日提住佢爸爸係殺人兇手？」「Mandy Chu」就認為白鴿黨都叫有因為「抗爭」被捕，反而「慢必係（喺）示威現場冇乜見過。」快必就似乎還唔到口：「現在我們討論議會內的抗爭，不應該顧左右而言他。」
白鴿黨區議員袁海文亦睇唔過眼，留言話涂謹申喺反對修訂《逃犯條例》期間有「唔少功勞」，仲質問：「如說往績不好，所以不信『民主派』，那《逃犯條例》一役，我們有哪裡做得不夠好？」「Jason Cheung」就回應話：「《逃犯條例》是你們的功勞嗎？沒有『街頭勇武者』，乜嘢（都）過晒，你們有用還需一百萬二百萬人上街？」■香港文匯報記者 鄭治祖